Թուրքիայի վերաբերյալ նոր զեկույցում Եվրախորհրդարանի պատգամավորները ևս մեկ անգամ կոչ են անում ճանաչել Հայոց ցեղասպանությունը:
448 կողմ, 67 դեմ և 107 ձեռնպահ ձայների հարաբերակցությամբ ընդունված զեկույցում պատգամավորները զգուշացնում են, որ չնայած Թուրքիայի՝ ԵՄ անդամ դառնալու մտադրության մասին բազմաթիվ հայտարարություններին, վերջին երկու տարվա ընթացքում երկիրը հետևողականորեն հետ է կանգնել անդամակցության գործընթացի հետ կապված իր պարտավորություններից։
Հղում անելով 2015 թվականի ապրիլի 15-ի Եվրախորհրդարանի՝ Հայոց ցեղասպանության 100-րդ տարելիցի կապակցությամբ ընդունած բանաձևին՝ պատգամավորները ևս մեկ անգամ խրախուսում են Թուրքիային ճանաչել Հայոց ցեղասպանությունը։
Զեկույցում նշվում է, որ Եվրախորհրդարանը բարձր է գնահատում Թուրքիայի և Հայաստանի միջև վերջին շփումները, հատուկ ներկայացուցիչների նշանակումը և երկու երկրների միջև թռիչքների վերսկսումը:
Խորհրդարանը այս զարգացումները «խիստ դրական» է գնահատում և համարում, որ դրանք դրական ազդեցություն կունենան տարածաշրջանի բարգավաճման և անվտանգության վրա: Կողմերին խրախուսում է շարունակել ջանքերը՝ հարաբերությունները լիարժեք կարգավորելու նպատակով և կոչ է անում ԵՄ-ին ակտիվորեն աջակցել այս գործընթացին։
Խորհրդարանը կոչ է անում Թուրքիային ճանապարհ հարթել թուրք և հայ ժողովուրդների միջև իրական հաշտեցման համար, այդ թվում՝ Հայոց ցեղասպանությունը ճանաչելու միջոցով, ինչպես նաև լիովին հարգել հայկական մշակութային ժառանգությունը պաշտպանելու իր պարտավորությունները:
Եվրապատգամավորները հույս են հայտնում, որ դա կարող է հանգեցնել Հարավային Կովկասում հարաբերությունների կարգավորման:
Թուրքիայի իշխանություններին կոչ է արվում ակտիվացնել ջանքերը՝ արդյունավետորեն կարգավորելու երկրում հայերի և այլ փոքրամասնությունների «սարսափելի վիճակը»:
Եվրախորհրդարանը նաև մտահոգություն է հայտնում այն կապակցությամբ, որ «Գորշ գայլեր» ծայրահեղական շարժումը տարածվում է ոչ միայն Թուրքիայում, այլև ԵՄ անդամ երկրներում: Այն կոչ է անում ԵՄ-ին և դրա անդամ պետություններին դիտարկել ԵՄ երկրներում կազմակերպության գործունեությունը արգելելու հնարավորությունը:
