Երվանդաշատի դպրոցի 4 շրջանավարտներից որևէ մեկը բուհ չի դիմել
Սահմանամերձ Երվանդաշատ համայնքի դպրոցն այս տարի 4 շրջանավարտ ունի, 3 առաջին դասարանցի։ Շրջանավարտների մեջ բուհի դիմորդներ չկան: Դպրոցի 64 աշակերտները, բացի 9-րդ դասարանից, սովորում են երկհամակազմ դասարաններում։ Այսինքն՝ տարբեր դասարանների աշակերտներ նույն առարկաների դասերը միասին են անցկացնում։ Սա, դպրոցի տնօրենի կարծիքով, վատ է անդրադառնում առաջադիմության վրա: Սահմանամերձ գյուղի դպրոցը նաև ռազմագիտության դասասենյակ չունի. զենքին ծանոթանում են տեսականորեն՝ նկարների միջոցով:
Սահմանամերձ Երվանդաշատ գյուղի դպրոցն այս տարի 4 շրջանավարտ ունի. 9-րդ դասարանից հետո դասընկերներից երեքը կրթությունը շարունակել են քոլեջներում, բայց դա չի խանգարել, որ հարազատ դպրոցում վերջին զանգը հնչի նաև նրանց համար: 12-րդ դասարանի աշակերտուհի Քրիստինեն է պատմում.
«Քանի որ մենք արդեն ավարտում ենք ու վերջին զանգ ենք անելու, նրանց էլ ենք ուզում ընդգրկել: Սկզբում 7 հոգի էինք՝ 3 տղա և 4 աղջիկ: Ես որոշել եմ վարսավիր դառնալ»:
Քրիստինեն՝ վարսավիրի, Անին՝ մատնահարդարի մասնագիտություններն են ընտրել, բուհերի դիմորդ չունեն: Երվանդաշատի դպրոցում 64 աշակերտ է սովորում, 10-րդ դասարան չունեն, այսինքն՝ 2 տարի հետո դպրոցն ավարտական դասարան չի ունենա: Բոլոր դասարանները, բացի 9-րդից, երկհամակազմ են՝ 12-րդ դասարանցիների հետ միաժամանակ նույն դասաժամն են անցնում նաև 11-րդցիները: Դպրոցի տնօրեն Լուսինե Գասպարյանն ասում է, որ սա բացասաբար է անդրադառնում կրթության որակի վրա.
«Եթե աշակերտների քանակը չի գերազանցում 15-ը, ուրեմն պետք է լինի երկկոմպլեկտ, չնայած դա շատ է ազդում աշակերտի առաջադիմության վրա: Մենք ունենք 5-րդ և 6-րդ դասարաններ, որոնք դասերը համատեղ են անում։ Ե՛վ 5-րդ, և՛ 6-րդ դասարաններում ունենք լավ սովորողներ, բայց կոմպլեկտավորված դասարանների դեպքում թուլանում են, որովհետև ուսուցիչը 45 րոպեի ընթացքում չի կարողանում աշխատել միայն մի դասարանի հետ»:
Դպրոցի ամենամեծ դասարանը 2-րդն է՝ 12 աշակերտով։ Նրանց հետ միաժամանակյա դասեր ունեն առաջին դասարանի 3 աշակերտները: Երվանդաշատի դպրոցը 300 աշակերտի համար կառուցված տիպային կառույց է: Տնտեսված միջոցներով այժմ վերանորոգվում է կրտսեր դպրոցի մասնաշենքը՝ 4 դասարանով.
«Ասում են, որ 2023թ հունվարից յուրաքանչյուր երեխա պետք է նստի իր տարիքային խմբի հետ, հետևաբար՝ մեզ անհրաժեշտ են 4 արևադեմ դասարաններ, որ գոնե ամեն դասարան, թեկուզ քիչ քանակով, առանձին դասասենյակ ունենա»:
Արմավիրի մարզպետարանի կրթության, մշակույթի և սպորտի վարչության պետ Սոնյա Բուդաղյանն ասում է, որ փոքր համակազմ ունեցող դպրոցների տարրական ուսուցման պայմանները դեռ հստակեցված չեն.
«Նախարարությունը ինչ-որ քայլեր ձեռնարկում է երկհամակազմ և եռահամակազմ դասարանների համար, բայց այս պահի դրությամբ պաշտոնական որևէ բան չեն կարող ասել»:
Սահմանամերձ գյուղի դպրոցում չկա ռազմագիտության դասասենյակ․ աշակերտներն այստեղ միայն տեսական գիտելիքներ են ստանում, զենքին ծանոթանում են միջանցքում փակցված նկարների միջոցով: Սոնյա Բուդաղյանի խոսքով՝ դպրոցն ինքը կարող է նախաձեռնել այդ դասարանի ստեղծումը։
«Համապատասխան պայմանների դեպքում իրենք մեզ միջնորդություն կգրեն, մենք դրա հիման վրա կդիմենք ԿԳՄՍ և զենքի հարցը կկարգավորվի: Դա ընթացակարգային խնդիր է և լուծվող»:
Երվանդաշատի դպրոցում տղաներն աղջիկներից ավելի շատ են: Լուսինե Գասպարյանը, որը 5 ամիս է տնօրինում Երվանդաշատ գյուղի դպրոցը, ասում է՝ նպատակ ունի բարձրացնել տղաների ֆիզիկական պատրաստվածությունը.
«Մեր տղաները մեր վաղվա զինվորներն են, իմ հեռանկարային նպատակներից մեկը հրաձգարան բացելն է և մի քանի ուսումնական զենք ձեռք բերելը, որպեսզի մեր տղաները կարողանան կրակել սովորել դպրոցում, ոչ թե բանակում»:
Ռազմագիտության գործնական պարապմունքների բացը փորձել են լրացրել Երվանդաշատի սահմանապահ ուղեկալում, որտեղ բարձրդասարանցիները գործնականում են ծանոթացել զենքի տեսակներին, սովորել են քանդել ու հավաքել դրանք: