Հայաստանը կարևորում է Վրաստանի հետ հարաբերությունների զարգացումը. նախագահը Թբիլիսիում է
Վրաստանը կարևորում է Հայաստան-Ադրբեջան հարաբերությունների կարգավորումը։ Թբիլիսիում ողջունելով հայ գործընկերոջը, ասել է նախագահ Սալոմե Զուրաբիշվիլին՝ ընդգծելով քննարկել են հայ-ադրբեջանական երկխոսության ընթացքը․
«Վրաստանը ողջունում է Եվրամիության աջակցությամբ հայ-ադրբեջանական երկխոսությունը, որը տարածաշրջանում խաղաղության ու կայունության հիմքն է։ Հույս ունենք, որ Հայաստանի և Ադրբեջանի միջև բանակցությունները կշարունակվեն հաջողությամբ։ Այս բանակցությունների արդյունքներից է կախված տարածաշրջանում լիակատար խաղաղության հաստատումը, որից կախված են տնտեսական զարգացումը, բոլոր նոր ծրագրերը»։
Վրաստանի նախագահը այս համատեքստում անդրադարձավ Վրաստանի հայերի ու ադրբեջանցիների խաղաղ համակեցությանը՝ նշելով դա խաղաղ համակեցության աննախադեպ օրինակ է ոչ միայն Հարավային Կովկասում, այլև ողջ աշխարհում։
Զուրաբիշվիլին կարևորեց տարածաշրջանի տրանսպորտային ներուժը, տրանսպորտային հաղորդակցությունների վերաբացումը, համատեղ ծրագրերի իրականացումը։
Այս տարի լրանում է Վրաստան-Հայաստան դիվանագիտական հարաբերությունների 30-ամյակը։
«Այս 30 տարիները համընկել են երկու երկրների համար ամենադժվար տարիների հետ, բայց մեր հարաբերությունները ամբողջությամբ բարիդրացիական են եղել, և դա է ցույց տալիս նաև մեր դարավոր պատմությունը», -ասել է Վրաստանի նախագահը։
Վահանգն Խաչատուրյանն իր հերթին ընդգծել է, որ տարին առանձնահատուկ է հայ-վրացական հարաբերությունների համար․ «լրանում է Հայաստանի և Վրաստանի միջև դիվանագիտական հարաբերությունների հաստատման 30-ամյակը, բայց մեր երկրների միջև բարեկամությունն ունի հազարամյակների պատմություն»։
Հայաստանը մեծ կարևորություն է տալիս հարևան Վրաստանի հետ հարաբերությունների շարունակական զարգացմանն ու ամրապնդմանը, որի համար առկա են բոլոր նախադրյալները:
ՀՀ նախագահի խոսքով՝ բարձր մակարդակի հանդիպումների ինտենսիվությունը վկայում է փոխշահավետ համագործակցությունը բոլոր ուղղություններով առավել ընդլայնելու երկկողմ հաստատուն հանձնառության մասին․
«Հայ-վրացական հարաբերությունները դինամիկ զարգացում են արձանագրել, և պատահական չէ, որ ՀՀ կառավարության ծրագրում այդ հարաբերությունները որակվել են առանձնահատուկ բարիդրացիական»։
Նա ևս ընդգծեց, որ հանդիպմանն անդրադարձել են անվտանգային, քաղաքական և տարածաշրջանային նշանակության հարցերին․
«Ցանկանում եմ ընդգծել, որ նման հարցերում առկա փոխըմբռնումը պայմանվորված է հայ-վրացական անխախտ բարեկամության գիտակցմամբ»։
Խաչատուրյանը հատկապես կարևորեց Պարսից ծոց Սև ծով միջազգային տրանսպորտային միջանցքը, դրանում Հայաստանի և Վրաստանի մասնակցությունը։
Նախագահը վստահություն է հայտնել, որ քննարկված հարցերը իրենց արդյունքները կունենան՝ նոր որակ և բովանդակություն հաղորդելով հայ-վրացական հարաբերություններին։
Այցի շրջանակներում ՀՀ նախագահն հանդիպելու է Վրաստանի վարչապետի, խորհրդարանի նախագահի և Համայն վրաց պատրիարքի հետ, լինելու է կառույցներում Թումանյանի տուն մշակութային կենտրոնում, հայ գրողների պանթեոնում։
