ԿարևորՀասարակություն

Աշխարհահռչակ ձեւագէտը՝ Մայքըլ Ճաքսոնի․ Հայաստանի մէջ կ՛ուզէ բանալ իր դպրոցը

Աշխարհի յայտնիներուն համար երգիչներու, դերասաններու յատուկ հագուստներ պատրաստած է հայազգի ձեւագէտ Ալեք Ատորեան։ Ան ծնած է Թաւրիզ-Պարսկաստան, ապա մեկնած է Լոնտոն եւ հոնկէ ալ անցած՝ Ամերիկայի Միացեալ Նահանգներ։

Ալեքի մայրը Պասկաստանի թագաւորին ձեւագէտ-կարողը եղած է։ Ալեք փոքր տարիքին յաճախ կ՛երթար մօր քով ու երկար ժամանակ հոն անցնելով , դիտելով կրցած է իւրացնել մօր արհեստը։ Ինչպէս կը պատմէ հիւրս՝ 1974-ին անցած է Լոնտոն եւ հոն ապրած՝ 13 տարի։ Ալեքի նախասիրութիւններէն եղած է նաեւ պարելը, Լոնտոնի մէջ մասնակցելով պարի մրցոյթին՝ ան կը ստանայ մրցանակ պարի մէջ, ու հոնկէ կը սկսի Ալեքի շրջագայութիւնները դէպի տարբեր երկիրներ։ Ալեք Ատորեան  մրցոյթի համար հագուելիք իր տարազները ինք կը կարէր։

Շատերուն համար հետաքրքրական էր, թէ ո՞վ կը պատրաստէր Ալեքի հագած յատուկ տարազները, որոնցմով ան ելոյթ կ՛ունենար։ Օր մըն ալ դուռը կը թակէ աշխարհահռչակ   երաժիշտ՝ Էլթըն Ճօն , որը առաջին յայտնի հաճախորդը կ՛ըլլայ Ալեքի ապագայ ասպարէզի հանրահռչակման համար։ Յետոյ Էլթըն Ճօնին յաջորդած է Մայքըլ Ճաքսոնը, Ճանէթ Ճաքսոնը, Եւա Լոթերը, Ճէնիֆըր Լոփէզը եւ շատ ու շատ աստղեր ․․ ։ 

Ալեք Ատորեան  արդէն կը վաստակէ  անուն ու հռչակ Ամերիկայի մէջ։  Ան երբէք չէ թաքցուցած իր հայազգի պատկանելիութիւնը, ան պարծանքով յայտարարած է է իր հայ ըլլալու մասին։ Գործածած է վառ գոյներ հայկական, ինչպէս Մարտիրոս Սարեանի գոյներն էին` կարմիրը, կապոյտը, դեղինը ․․․։ Յաճախ ներշնչուած է ծաղիկներէն, ինչպէս կ՛ըսէ ինքը։

Musical Alma award-ին Եւա Լանգորիան եւ միւս մասնակիցները այդ ելոյթին հագած են Ալեքի յօրինած ու պատրաստած հագուստները։ Ալեք կը պատմէ , թէ առանց գծելու ուղղակի կը ստեղծագործէր կերպասին վրայ։ Ան կը կարծէ, որ նոր սերունդի ձեւագէտները պէտք է օգտուին իր փորձառութենէն։

Մետաղեայ  թէփերով ոսկեգոյն պիճակը Ալեք ձեւած է աշխարհահռչակ անուանի երգիչ Մայքըլ Ճաքսոնին համար։ Իսկ 1999-ին հագուստ մը պատրաստած է ճենիֆըր Լոփէզին համար։

Ալեք Ատորեան աշխարհի զանազան երկիրներ այցելած է , սակայն  նախընտրած է հաստատուիլ Հայաստան ու հիմնել իր դպրոցը։  Տարի մը առաջ  Հայաստան ժամանած  ձեւագէտը, այստեղ կ՛ուզէ յատուկ դպրոց մը բանալ ձեւագիտութեան,  եւ պատրաստել սերունդ մը այս ասպարէզին մէջ, որպէսզի կարենայ փոխանցել  իր փորձն ու հմտութիւնները։

Մեր հիւրն էր՝ Ալեք Ատորեան։

Back to top button