ԿարևորՀասարակություն

«Հրանդ Տինք. հոս եւ հիմա» ցուցահանդէսը․ Պոլիսէն Երեւան

Երեւանի մէջ բացումը կատարուեցաւ «Հրանդ Տինք. հոս եւ հիմա» խորագիրով ցուցահանդէսին, որ նուիրուած է Հրանդ Տինքի սպանութեան 15-րդ տարելիցին։ Ան կը ներկայացնէ անոր կեանքն ու պայքարը: Ցուցահանդէսը Հրանդ Տինքի սպանութեան վայրը հիմնուած «23.5» յուշավայրի քաղուածքն ու շարունակութիւնն է։ 1996 թուականի Ապրիլ 23-ին Հրանդ Տինք «Ակօս» թերթին մէջ հրապարակած էր «Ապրիլ 23 ու կէս» յօդուածը։

Պոլսոյ մէջ «23,5» յուշավայրը նման է թանգարանի, ուր կարելի է այցելել ամէն օր՝ բացի երկուշաբթիէն: Ան բաց է հանրութեան համար եւ լոյս կը սփռէ Հրանդ Տինքի կեանքին, գործունէութեան, նուաճումներուն, «Ակօս»-ի պատմութեան, սպանութեան յանգեցնող իրադարձութիւններուն, սպանութեան յաջորդող անցուդարձերուն եւ Յունուար 19-ի ոգեկոչումներուն վրայ, որովհետեւ 15 տարի ետք տակաւին հազարաւոր մարդիկ կը հաւաքուին շէնքին առջեւ՝ ոգեկոչելու Հրանդ Տինքը եւ արդարութիւն պահանջելու: Միւս կողմէ՝ ամէնէն կարեւոր գործերէն մէկն էր տարածել այն համաշխարհային արժէքները, որոնց կը դաւանէր Տինք: Արդարեւ, ան համակեցութեան, հաւասարութեան, խաղաղութեան եւ ժողովրդավարութեան երազներ ունէր:

«Անշուշտ, մեր փափաքն է այս ցուցահանդէսը կազմակերպել ուրիշ երկիրներու մէջ եւս: Հարկաւ, մեզի համար Երեւանը մեկնակէտը պիտի ըլլար: Եթէ համաճարակը եւ աննպաստ պայմանները չըլլային, ապա զայն բաւական առաջ կազմակերպած կ’ըլլայինք այստեղ»,ըսաւ «23.5» յուշավայրի տնօրէն Նայաթ Քարաքէօսէ Առաջին լրատուականին տուած հարցազրոյցին մէջ։

Ցուցահանդէսը կը սկսի իր ուղեւորութիւնը Պոլիսէն Երեւան։ «Հրանդ Տինք. հոս եւ հիմա» խորագիրը կրող ցուցահանդէսին բացումը տեղի ունեցաւ 7 Մայիսին եւ բաց պիտի մնայ մինչեւ 30 Յուլիս, Նորարար փորձառական արուեստի կեդրոնին մէջ (ՆՓԱԿ)։

Հրանդ Տինք իսկական ժողովրդավար էր, մարդկային իրաւունքներու պաշտպան։

«Ակօս» թերթը հիմնուած է 1996-ին Հրանդ Տինքի եւ անոր գործընկերներուն կողմէ: Թերթին նպատակն էր խթանել հայ մշակոյթը՝ իրազեկելու հայերու եւ Թուրքիա ապրող այլ փոքրամասնութիւններու խնդիրներուն մասին եւ լսելի դարձնելու անոնց ձայնը:

Back to top button