Վերնատուն

«Հայկական ֆիլմ ֆորում»․ կինոոլորտի խնդիրները՝ մեկ դաշտում․ «Վերնատուն»

«Հայկական Ֆիլմ Ֆորում» տարեկան միջոցառումն այս տարի անցկացվել է երկրորդ անգամ։ Միջոցառման ընթացքում ցուցադրվել, քննարկվել են 2019–2021 թվականներին կինոէկրան բարձրացած, հայկական արտադրության կամ համարտադրությամբ նկարահանված շուրջ 20 ֆիլմ, անդրադարձ է եղել կինոոլորտի արդի հարցերին։

«Հայկական ֆիլմ ֆորումի» համակարգող Վահան Խաչատրյանն ասում է, որ այս միջոցառումն ընդհանուր պատկերացում է տալիս, թե ինչ է տեղի ունենում հայկական կինոյի ոլորտում․ ինչ է արտադրվում, ինչ է նայում հանդիսատեսը։

Ասում է, որ մտայնություն կա, որ կինոն ժամանակին զուգընթաց չի քայլում, բայց հետաքրքիր օրինաչափությամբ բոլոր ֆիլմերը՝ լավ կամ վատ, արդի խնդիրների մասին են խոսում։

Վահան Խաչատրյանը կարևորում է այն, որ կինոյի ոլորտի կազմակերպություններն ու մարդիկ միմյանց հետ հաղորդակցվելու ու երկխոսելու հնարավորություններ են ունենում, բարձրաձայնում իրենց հուզող խնդիրները։

«Կուզեի, որ լայն համագործակցություն լիներ ոլորտի պետական հիմնարկների միջև՝ բուհ– նախարարություն–Կինոկենտրոն– Կինոարխիվ և այլն, այդ համագործակցության արդյունքում փոփոխություններ տեղի կունենան։ Մենք, որպես անկախ կազմակերպություն, փորձում ենք բոլորին բերել մի դաշտ», – ասում է Վահան Խաչատրյանը և հավելում․ «Մենք ունենք լավ փոփոխություններ․ շատ լավ կարճամետրաժ ֆիլմեր են նկարահանվում, որոնք ցուցադրվում են հայտնի փառատոններում, վաղը այդ երիտասարդները կարող են շատ հետաքրքիր լիամետրաժ ֆիլմեր նկարել»։

Ցուցադրել ավելի
Back to top button