Ռադիոլուր

Արեւմտահայերէն լուրեր Ապրիլ 14. 2022

Հարաւային Կովկասի մէջ Եւրամիութեան յատուկ ներկայացուցիչ Թոյվօ Քլաար գրած է․ «Հայաստանի վարչապետ Նիկոլ Փաշինեանի կարեւոր եւ հեռատես ելոյթը Ազգային ժողովին. Բազմաթիւ մարտահրաւէրներ կը մնան համապարփակ կարգաւորման ճանապարհին, սակայն կարեւոր է յառաջ շարժիլ: Հայաստանը ունի Եւրամիութեան աջակցութիւնը արդար խաղաղութեան որոնման համար»։

Երուսաղէմի Հայոց Պատրիարքութիւնը յայտարարած է, որ Սուրբ Յարութեան տօնէն առաջ Իսրայէլի ոստիկանութիւնը փորձած է սահմանափակումներ պարտադրել Յարութեան տաճարին մէջ։ Պատրիարքութեան դիւանապետ տէր Կորիւն վարդապետ Պաղտասարեան ըսած է , որ իրենք դէմ են պարտադրուող սահմանափակումներուն եւ այդ մասին յայտնած են Երուսաղէմի ոստիկանութեան։ Այժմ արձագանագի կը սպասեն։

Այսօր Աւագ Հինգշաբթի է: Առաւօտեան եկեղեցիներուն մէջ կը մատուցուի Ս. Պատարագ: Կը կատարուի Ոտնլուայ արարողութիւն: Իսկ երեկոյեան կը կատարուի Խաւարումի կարգ, որը կը վերաբերի Աւագ Ուրբաթին՝ խորհրդանշելով Տիրոջ խաչելութիւնն ու թաղումը: Աւագ Հինգշաբթի օրը կը խորհրդանշէ Քրիստոսի՝ իր փառքի աթոռին նստիլը իր տասներկու աշակերտներուն հետ:

Back to top button