ԿարևորՔաղաքական

Պուտինը շնորհավորել է ՀՀ նախագահին և վարչապետին՝ Ռուսաստանի հետ դիվանագիտական ​​հարաբերությունների հաստատման 30-ամյակի կապակցությամբ

ՌԴ նախագահ Վլադիմիր Պուտինը շնորհավորել է Հայաստանի նախագահ Վահագն Խաչատուրյանին և վարչապետ Նիկոլ Փաշինյանին Ռուսաստանի Դաշնության հետ դիվանագիտական ​​հարաբերությունների հաստատման 30-ամյակի առթիվ և նշել, որ երկու երկրները բոլոր ոլորտներում համագործակցության զգալի փորձ են կուտակել:

«Ռուսաստանի և Հայաստանի միջև ընթանում է բովանդակալից քաղաքական երկխոսություն, զարգանում է արդյունավետ համագործակցություն առևտրային, տնտեսական, գիտական, տեխնիկական, հումանիտար և շատ այլ ոլորտներում: Մոսկվան և Երևանը համակարգում են ջանքերը ՀԱՊԿ-ի, ԵվրԱզԷՍ-ի, ԱՊՀ-ի և այլ միջազգային կառույցների շրջանակներում։ 2020 և 2021 թվականներին ձեռք բերված եռակողմ պայմանավորվածությունների հետևողական իրականացումը նպաստում է Անդրկովկասյան տարածաշրջանում անվտանգության և կայունության ամրապնդմանը»,- ասվում է կիրակի օրը Կրեմլի կայքում տեղադրված շնորհավորական հեռագրում։

Բացի այդ, ՌԴ նախագահը վստահություն է հայտնել, որ ռուս-հայկական բարեկամական, դաշնակցային կապերի հետագա ամրապնդումը համապատասխանում է երկու երկրների ժողովուրդների հիմնարար շահերին։

Պուտինը Հայաստանի նախագահին և վարչապետին մաղթել է քաջառողջություն և հաջողություններ, իսկ երկրի քաղաքացիներին՝ խաղաղություն և բարօրություն։

Հայաստանն ու Ռուսաստանը ուղիղ 30 տարի առաջ՝ 1992թ. ապրիլի 3-ին, հուշագիր ստորագրեցին դիվանագիտական ​​հարաբերությունների հաստատման մասին և վերջին տասնամյակների ընթացքում դրսևորեցին սերտ դաշնակցային համագործակցություն։

Back to top button