ԿարևորՄշակույթ

Հալէպի Պ․Ադամեան թատերախումբի 60- ամեակին առիթով

Թատրոնի միջազգային օրուան առիթով եւ Հայկական Բարեգործական Ընդհանուր միութեան  պատկան Պետրոս Ադամեան թատերախումբի 60 -ամեակին առիթով, Երեւանի մէջ բնակող ադամեանականները կազմակերպած են յատուկ միջոցառում ՝ 27 Մարտ,2022-ին ժամը 19․00-ին, ՀԲԸՄ Հայաստանի դահլիճէն ներս ։

Զրուցակիցս՝ Ադամեան թատերախումբի  տարիներու վաստակ ունեցող դերասանուհի Արաքսի Ստեփանեան-Մուսալլին  է։ 60-ամեակի յուշամատեանը լոյս պիտի տեսնէ Հալէպի մէջ եւ 27 Մարտին գինեձօն-շնորհանդէսը տեղի պիտի ունենայ նոյն օրը, գիրքը պատրաստած են Ներսէս Տաղլեանն ու Յակոբ Միքայէլեանը։

«Ադամեան թատերախումբը 60 տարուան մէջ՝ 64 հեղինակի թատերգութիւն ներկայացուցած է, 96 ներկայացում, 621 ելոյթ ունեցած է։ 16 բեմադրիչ հրաւիրած է, որոնցմէ 6 ,7 Հայաստանէն հրաւիրած է, 355 դերակատար, դերակատարուհի ունեցած է»։

Թատրոնի միջազգային օրը երեւանաբնակ ադամեանականները պիտի ներկայցնեն Ուիլիամ Սարոյեանէն պատկեր մը, Նիկոլայ Ծատուրեանի բեմադրութեամբ։ Երեք տարի առաջ Հայաստանի մէջ ադամեանական դերակատարները  հաւաքած էր՝ Յակոբ Միքայէլեանն ու Արաքսի Ստեփանեանը եւ հանրութեան ներկայացուցած՝  կատակերգական պատկերներ, որոնք լաւ արձագանգ թողեցին Հայաստանի լայն հասարակութեան մէջ։

Արաքսիի համար Ադամեանական ըլլալը ուրիշ զգացում է, «մենք այլեւս ընտանիք ենք»։ անոնք ծիլ մըն ալ Հայաստանի մէջ ցանեցին։

Ադամեանականներու ցանկութիւնն է հիմնել արեւմտահայ թատրոն մը Երեւանի մէջ։«Չէ որ թատրոնը դպրոց է , Հայաստանէն դուրս 10 միլիոն սփիւռք ը մեզի կը լսէ, եկէք պահպանենք այս լեզուն , արեւմտահայ թատրոնը պահպանենք», ըսաւ Արաքսի ոգեւորութեամբ։

Արաքսիի կարծիքով՝  «Եթէ մաքուր հայերէն խօսինք մենք իրար կը հասկնանք։ Ոչ հայաստանցին թող ռուսերէն խառնէ, ոչ ալ մենք ֆրանսերէն խառնենք , իրար կը հասկնանք»։

Կեցցէ՛ այն թատրոնը , որ նոյնիսկ Սուրիոյ պատերազմի թէժ օրերուն չի դադրեցաւ գործունէութենէն։ Երեւանբնակ ադամեանականները ուխտած են կառչած մնալ իրենց հարազատ թատրոնին։

Շնորհաւոր 60- ամեակդ սիրելի Ադամեան թատերախումբ․․․

Back to top button