Կանգնում ես պատշգամբում եւ նայում Արարատին, կամ քո ապակեպատ հյուրասենյակից` կանաչապատ այգուն։ Առաջարկներ ամեն տեսակի ու տարբեր տեղեր։ Եվ քո ցանկությունը կարող է իրականություն դառնալ, միայն թե հնարավորություններդ թույլ տան։
Ավանից մինչեւ Էրեբունի ու Շենգավիթ, մինչեւ Մալաթիա, Արաբկիր ու Դավիթաշեն. Երեւանում ակտիվ բնակարանաշինության ականատեսն ենք։
Ու բնական հարց է առաջանում, իսկ ովքե՞ր են գնում այդ բնակարանները։ Կամ գնո՞ւմ են արդյոք։ Ունես հավաքած գումար, բայց դա բավարար չէ բնակարան գնելու համար, սակայն պարզվում է հիպոթեքային վարկ ստանալն էլ այնքան հեշտ չէ։
Մեր հյուրը` Անշարժ գույքի բորսայի տնօրեն Արտյոմ Պրիբիլսկին ասում է, որ նորակառույց շենքում 1քմ բնակարանի ինքնարժեքը 400 դոլար է։
Տեսնելով, թե ինչ արժեն շուկայում բնակարանները, պիտի արձանագրենք պահանջարկի եւ առաջարկի խզում, կարող է հաղթահարվել միայն մրցակցության աճով։ Բայց ակտիվ բնակարանաշինությունն այնքան ակտիվ չէ, որ էապես ազդի բնակարանների գնի վրա։
- Ովքե՞ր են նորակառույց բնակարանների գնորդները,
- ավելի ձեռնտու է բնակարանը գնել կառուցապատողի՞ց, թե՞ անշարժ գույքի գործակալներից,
- ավելի շահավետ է գնել բնակարան Երեւանո՞ւմ, թե՞ հող գնել եւ տուն կառուցել մայրաքաղաքից դուրս։
Արմեն ՎԱՐԴԱՆՅԱՆ
«Խոշորացույցի» տաղավարում Անշարժ գույքի բորսայի տնօրեն Արտյոմ Պրիբիլսկու հետ քննարկում ենք բնակարանաշինության խնդիրները։