ԿարևորՀասարակություն

Մեկնարկում է Կապանի կրթական նոր մոդելի իրագործումը. պահուստային ֆոնդից միջոցներ են հատկացվել

Կառավարության որոշմամբ պետական բյուջեի պահուստային ֆոնդից ՀՀ կրթության, գիտության, մշակույթի և սպորտի նախարարությանը հատկացվել է 67 մլն 125 հազար դրամ գումար` Սյունիքի մարզի Կապան խոշորացված համայնքի կրթական նոր ծառայությունների ներդրման ծրագրի մեկնարկման և «Ճանապարհաշինարար» արձանի գեղարվեստական լուսավորման համար:

Նախագծի ներկայացման ժամանակ ԿԳՄՍ նախարար Վահրամ Դումանյանը նշել է, որ հատկացումն արվում է ՀՀ կառավարության՝ կրթական ռեֆորմների շարունակականությունն ապահովելու հանձնառության շրջանակում:

Վահրամ Դումանյանի տեղեկացմամբ` վերոնշյալ գումարից շուրջ 60 մլն դրամը նախատեսված է Կապան խոշորացված համայնքի 13 գյուղական բնակավայրերում կրթական որակյալ ծառայությունների հասանելիության ապահովման նպատակով կրթահամալիրների ստեղծման նախագծանախահաշվային փաստաթղթերի մշակման և փորձաքննության համար: Նախատեսված է իրականացնել կրթահամալիրների վերակառուցման և կառուցման աշխատանքներ: Ստորև ներկայացվում են նախատեսվող աշխատանքները` ըստ բնակավայրերի.

Կրթահամալիրների վերակառուցում

  • Աճանան
  • Օխտար
  • Արծվանիկ
  • Գեղանուշ
  • Սյունիք
  • Եղեգ
  • Ծավ
  • Ճակատեն

Նոր կրթահամալիրների կառուցում

  • Ներքին հանդ
  • Շիկահող

Մոդուլային կրթական հաստատությունների կառուցում

  • Վերին Խոտանան
  • Դավիթ Բեկ
  • Եղվարդ

Նշված բոլոր բնակավայրերը աշխատանքների ավարտից հետո կունենան ժամանակակից կրթական շենքային պայմաններ` ապահովված համապատասխան լաբորատորիաներով, մարզադահլիճներով և այլ անհրաժեշտ ենթակառուցվածքներով: Նոր կրթահամալիրներում կկազմակերպվեն նախադպրոցական և հանրակրթական ծառայություններ, ինչպես նաև կիրականացվեն լրացուցիչ կրթական ծրագրեր` ըստ համայնքների կարիքների: Նոր կրթօջախները կծառայեն նաև որպես բնակավայրի մշակութային և մարզական կենտրոններ:

Նոր կրթահամալիրներից 7-ը կծառայեն նաև շրջակա բնակավայրերի երեխաների համար: Այդ նպատակով կգործարկվեն 8 երթուղիներ` դրանց սպասարկման համար ձեռքբերված տրանսպորտային միջոցներով, որոնք կունենան վարորդ և ուղեկցորդ:

ԿԳՄՍ նախարարը նաև տեղեկացրել է, որ Կապանի ծրագրի իրագործման կազմակերպչական խնդիրները տեղում արձանագրելու նպատակով նախարարության ներկայացուցիչները Հայաստանի մանուկների հիմնադրամի և այլ գործընկերների հետ վերջերս այցելել են Սյունիք: Տեղում կատարված դիտարկումների արդյունքներով որոշվել է Սիսիանի թիվ 1 հիմնական, Կապանի թիվ 9 ավագ և Գորիսի թիվ 4 ավագ դպրոցները ներառել Կառավարության ծրագրով հիմնանորոգվող 300 դպրոցների պետական ծրագրում: Քննարկվում է նաև «Հայաստանի մանուկներ» հիմնադրամի աջակցությամբ Կապանի գյուղական բնակավայրերից մեկում սմարթ կենտրոնի կառուցման ծրագիրը:

Նախարար Վահրամ Դումանյանը նաև նշել է, որ նույն որոշմամբ՝ Չարենցավան համայնքում գտնվող «Ճանապարհաշինարարներ» արձանի տարածքի լուսավորության ցանցի անցկացման համար կհատկացվի շուրջ 7 մլն դրամ գումար:

Արձանի հիմնանորոգումը կատարվել էր 2021 թվականի՝ հուշարձանների նորոգման ծրագրով:

Կառավարության նիստի ընթացքում ՀՀ վարչապետ Նիկոլ Փաշինյանը, անդրադառնալով պահուստային ֆոնդից ԿԳՄՍ ոլորտներին ուղղված հատկացումներին, ընդգծել է, որ կրթության համակարգի բարելավումը պետական համալիր ռազմավարություն է, և դրա ամբողջական իրագործումը միայն մեկ գերատեսչության խնդիր չէ:

«Կրթության ոլորտում Կառավարության ծրագրով նախանշված ծրագրերը պետական առաջնահերթություն են»,- շեշտել է նա:

Վարչապետը կարևորել է նաև իրականացվող աշխատանքների նկատմամբ հանրային վերաբերմունքի ձևավորման խնդիրը` որպես մտահոգություն նշելով, որ «Ճանապարհաշինարարներ» արձանը մի քանի անգամ կողոպտվել է: Վարչապետը շեշտել է, որ նման դեպքերը պետք է բացառվեն, և ոստիկանությունը արձանի պահպանման համար պատասխանատվություն է կրում:

Back to top button