ԿարևորՀասարակություն

Ապրումներն ու հույսերը Նախիջևանիկում

Մարգարիտա Ղուշունց
Արցախի հանրային ռադիո

Այն, որ թշնամին հաճախակի է դիմում սադրանքների  սահմանի ողջ երկայնքով, նորություն չէ: Ասկերանի շրջանում  վերջին օրերին փոքր տրամաչափի զինատեսակներից  բացի կրակել են նաև  գնդացիրներից: Միշտ են կրակում  Նախիջևանիկի ուղղությամբ, սակայն երկրորդ անգամն է, որ ականանետ են  կիրառում. 

«Թշնամին երկու 60 մմ արկ է գցել` մեկն ընկել է բնակելի տնից մոտ 300-400 մ հեռավորության վրա, մյուսը՝ անասնաֆերմաների մոտակայքում»։

Եթե հունվարի 10-ին թշնամին կրակել է դաշտում աշխատող տրակտորի վրա, ապա այս անգամ ուղղությունը կոնկրետ դեպի գյուղն էր: Դա  և՛ զարմանք, և՛ անհանգստություն է առաջացրել գյուղացիների շրջանում՝ ասում է համայնքապետը: 

«Այս պահին գյուղատնտեսական աշխատանքներ չի կատարվում: Օրինակ՝ սկսված է էտի սեզոնը, մարդիկ ցանկություն ունեն նոր այգիներ հիմնելու, սակայն անվտանգությունից ելնելով չեն սկսում: Վարելահողերի 30 տոկոսն անցել է թշնամու վերահսկողության տակ, 30 տոկոսից ավելին՝ սահմանամերձ է, իսկ այն ինչ մեզ է մնացել  ու անվտանգ է, բերրի հող չէ»: 

Նախիջևանիկի բնակիչ 71 ամյա Արփիկ տատիկին հանդիպեցինք դեպի գյուղապետարան տանող ճանապարհին, կենսաթոշակը ստանալու էր գնում:   Մեր հայրենի գյուղը երբեք չենք լքելու, արմատները խորն են գցված՝ ասում է.

«Գյուղի մի ծայրից մյուսը հարս եմ եկել: Ասում են՝ լավ ապրանքը գյուղում կմնա: Հինգ երեխա ունեմ, 19 թոռ ու 2 ծոռ: Տղաս ինձ հետ է ապրում: Բոլորը գյուղի հետ կապը պահում են: Ամբողջ օրն աշխատում ենք։ Կենսաթոշակը չի բավարարում։ Կանաչի, ձու եմ ծախում, կարիքներս հոգալու համար»: 

Տեղացիները քարից հաց քամող տեսակն են,  իրենք իրենց մասին ասում են գյուղացիները: Արփիկ տատիկի նման աշխատասեր մարդիկ Նախիջևանիկը քիչ չունի: Աշխատատեղերը հիմնականում համայնքապետարանը, դպրոնցն ու բուժկետն է: Գյուղի խնդիրների, գյուղացիների զբաղվածության  մասին է պատմում Սևակ Պետրոսյանը ․ 

«Անասնապահությամբ, հողագործությամբ, այգեգործությամբ են զբաղվում: Մինչ  պատերազմը աշխատատեղի, աշխատանքի խնդիր չկար։  Ոռոգման ջրի խնդիր կա, այս պահին աշխատանքներ են տարվում նոր ջրագիծ անցկացնելու համար, հույս ունենք՝ մինչև 2022-ի ավարտը ջուր կունենանք»: 

Գյուղը մանակպարտեզ չունի, չնայած նախադպրոցական տարիքի երեխաները շատ են՝ ասում է համայնքապետը: Վերջերս գյուղում խաղահրապարակ է կառուցվել։ Ինչպես պատերազմից առաջ, այնպես էլ հիմա, գյուղը նրանցով է ապրում։    Պատերազմից հետո էլ այստեղ նոր ընտանիքներ ու բալիկներ  են ծնվում:

Back to top button