Երաժշտական եռանկյունի

Ինչպես դառնալ պրոդյուսեր. Էռնա Ռեվազովան՝ հայաստանյան իրողությունների մասին․ «Երաժշտական եռանկյունի»

Ինչպե՞ս են դառնում պրոդյուսեր մեր երկրում. Հայաստանի պետական ջազ նվագախմբի պրոդյուսեր Էռնան Ռևազովան հարցին միանշանակ պատասխաններ չունի, քանի որ չկան կիրառական կրթական, ուսումնական ծրագրեր և հաստատություններ, և մասնագիտության մասին խոսելիս, նա ավելի շատ հիմնվում է անձնական նախաձեռնության և տարիների փաստացի փորձի վրա։

«Շատ բան է կախված նրանից, թե ի՞նչ ոլորտ ես ընտրել, ո՞ւմ հետ ես համագործակցում և ի՞նչ արդյունքներ ես արձանագրում»,- խոստովանում է պրոդյուսերը։

Նրա առաջին փորձը կապված է հրատարակչական գործի հետ, հետագայում իր ուշադրության կենտրոնում հայտվում են համերգային, կինո և հեռուստատեսային նախագծերը, և համացանցային ամենատարբեր ֆորմատները։

«Ինչ-որ պահին հասկացա որ իմ կազմակերպչական ունակություններն ու փորձը կարող եմ կիրառել նաև միջազգային մշակութային ֆորումներ և փառատոններ կազմակերպելով, ինձ հետաքրքիր են իմ մասնագիտության բոլոր դրսևորումները»։
Երաժշտական նախագծերի մասին խոսելիս նշում է, որ գերադասում է աշխատել փորձված և բարձր կատարողական արվեստին տիրապետող երաժիշտների հետ։

«Սիրում եմ աշխատել ինձ պես բծախնդիր և լավագույն արդյունքի ձգտող անհատականությունների հետ։ Դա ցանկացած նախագծի գլխավոր գրավականն է: Մի քանի ամիս առաջ էլ ստանձնել եմ Հայաստանի պետական ջազ նվագախմբի պրոդյուսերի պարտականությունները»:

Back to top button