ԿարևորՀասարակություն

Մասնավոր դպրոցների տարրական դասարանների աշակերտները կապահովվեն անվճար դասագրքերով

«Կրթության մասին» օրենքով պետությունը պետական բյուջեի հաշվին անվճար գրքերով ապահովում է միայն պետական դպրոցների առաջինից չորրորդ դասարանների աշակերտներին: ԱԺ «Քաղաքացիական պայմանագիր» խմբակցության պատգամավոր Սիսակ Գաբրիելյանն առաջարկում է փոփոխություն կատարել օրենքում, ըստ որի՝ տարրական դասարանների բոլոր երեխաները, անկախ հանգամանքից` սովորում են պետական, թե ոչ պետական դպրոցում,  գրքերը կստանան անվճար:

Հեղինակի տեղեկացմամբ՝ այսօր պետական դպրոցների տարրական դասարաններում սովորում է 150.000 երեխա, ոչ պետական դպրոցներում՝ ավելի քան 4.000:

Գլխադասային՝ ՀՀ ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի  դրական եզրակացությունը ներկայացրել է հանձնաժողովի անդամ Հասմիկ Հակոբյանը: Նրա խոսքով՝ նախագիծը վերացնում է առկա խտրական վերաբերմունքը: Պատգամավորը նշել է, որ Ազգային ժողովի նախորդ գումարման ընթացքում եւս հանձնաժողովը ստացել է բազմաթիվ բողոքներ՝ կապված դասագրքերի ձեռքբերման գործընթացում առկա անհավասարության հետ: Հասմիկ Հակոբյանը կոչ է արել կողմ քվեարկել նախաձեռնությանը:

Հարակից զեկույցում ԿԳՄՍ նախարարի տեղակալ Ժաննա Անդրեասյանը բարձրաձայնել է Կառավարության դրական տեսակետը: Նա նշել է, որ գործադիրը ներկայացրել է առաջարկություն, որն ընդունվել է:

Նախագիծն առաջին ընթերցմամբ քննարկվել է հունվարի 17-ի ԱԺ նիստում:

Ցուցադրել ավելի
Back to top button