Փակ ձևաչափով բաց խոսակցության հրավեր ընդդիմադիր խմբակցություններին՝ վարչապետից
Պատերազմին վերաբերող հարցերից շատերը բաց ու լուրջ խոսակցություն են ենթադրում։ Վարչապետ Փաշինյանն այսօր ընդդիմադիր երկու խմբակցություններին ողջ կազմերով հրավիրել է այդ զրույցին։
«Ես ընդունում եմ առաջարկը և երկու ընդդիմադիր խմբակցություններին ամբողջ կազմով հրավիրում եմ հանդիպման»,– ասել է Փաշինյանը և նկատել, որ ընդդիմությունը հարցեր է տալիս՝ իմանալով, որ դռնբաց ռեժիմով դրանց պատասխանելը դժվար է։
Այս հայտարարությունը վարչապետն արել է ի պատասխան «Պատիվ ունեմ» խմբակցության պատգամավոր Տիգրան Աբրահամյանի հարցի, թե երբ են Փաշինյանին զեկուցել, որ պատերազմի շեմին ենք, և որ մեծ է պատերազմի հավանականությունը:
«Այն, որ պատերազմի շեմին ենք, կարծում եմ, որ ՀՀ ղեկավարներին զեկուցվել է շատ պարբերաբար, օրինակ՝ մասնավորապես 2011-ի Կազանյան փաստաթղթի չստորագրումից հետո: 2018-ին իմ վարչապետ դառնալուց հետո էլ այդպիսի զեկույցները եղել են պարբերաբար, որ տեղեկություններ կան, որ Ադրբեջանը նախապատրաստվում է պատերազմի: Այս ամբիոնից Սերժ Սարգսյանն էլ ասել է, որ այդ պահից սկսած ցանկացած պահի պետք է սպասել պատերազմի»,-ասել է Փաշինյանը:
Անդրադառնալով պատերազմն ավելի շուտ չկանգնեցնելու մեղադրանքին՝ Փաշինյանը հարցրել է՝ ընդդիմությունը չգիտե՞ր, որ պատերազմը կանգնեցնելու գինը բոլոր տարածքները տալու համաձայնությունն էր: