ԿարևորՍպորտ

ՀՖՖ-ն շնորհավորել է Նիկիտա Սիմոնյանին ծննդյան 95-ամյակի առթիվ

Հայաստանի ֆուտբոլի ֆեդերացիան շնորհավորել է լեգենդար ֆուտբոլիստ և մարզիչ, Ռուսաստանի ֆուտբոլային միության փոխնախագահ Նիկիտա Սիմոնյանին ծննդյան 95-ամյակի կապակցությամբ.

«ՀՖՖ-ն իր խորին երախտագիտությունն է հայտնում Նիկիտա Սիմոնյանին հայկական ֆուտբոլի զարգացման մեջ անգնահատելի ավանդ ունենալու համար: Սիմոնյանի անվան հետ են կապված հայկական ֆուտբոլի ամենավառ էջերը: Եվս մեկ անգամ շնորհավորելով հոբելյարին՝ մաղթում ենք նրան քաջ առողջություն, երջանկություն և բարեկեցություն»,-ասված է շնորհավորական ուղերձում:

Նիկիտա Սիմոնյանը ծնվել է 1926 թվականին: Հայ անվանի ֆուտբոլիստը խաղացել է Սուխումի «Դինամո»-ում (1940), Մոսկվայի «Կռիլյա Սովետով» (1946/48) և «Սպարտակ» (1949/59) ակումբներում: ԽՍՀՄ առաջնություններում, որպես ֆուտբոլիստ, անցկացրել է 267 հանդիպում, խփել` 144 գնդակ: 1956 թվականի Օլիմպիական խաղերի չեմպիոն է, ԽՍՀՄ բազմակի չեմպիոն և գավաթակիր: ԽՍՀՄ վաստակավոր մարզիչ: 1973 թվականին Երևանի «Արարատ»-ը նրա ղեկավարությամբ դարձել է ԽՍՀՄ չեմպիոն և գավաթակիր: Սիմոնյանը գլխավորել է նաև Մոսկվայի «Սպարտակ»-ը (ԽՍՀՄ կրկնակի չեմպիոն և եռակի գավաթակիր) և Օդեսայի «Չեռնոմորեց»-ը, ինչպես նաև ԽՍՀՄ հավաքականը (1976/79): Այժմ Ռուսաստանի Դաշնության ֆուտբոլային միության առաջին փոխնախագահն է:

Ականավոր ֆուտբոլիստն ու մարզիչը պարգևատրվել է ՖԻՖԱ-ի շքանշանով: Արժանացել է նախկին ԽՍՀՄ բազմաթիվ մեդալների ու շքանշանների: Պարգևատրվել է Հայաստանի Հանրապետության «Մովսես Խորենացի» մեդալով, Երևանի պատվավոր քաղաքացի է:

Ցուցադրել ավելի
Back to top button