Ռուսաստանն ու Թուրքիան քննարկման հարցերի լայն շրջանակ ունեն՝ Սիրայի ու Լիբիայի խնդիրներից մինչև Աֆղանստան ու Արցախ, հարցերից շատերի վերաբերյալ Մոսկվան ու Անկարան տարբեր կարծիքներ ունեն՝ «Ռադիոլուրի» հետ զրույցում, անդրադառնալով Պուտին-Էրդողան հանդիպմանը, նկատել է «Կովկաս» ինստիտուտի փորձագետ Հրանտ Միքայելյանը։
Նրա խոսքով՝ այս փուլում հատկապես թեժ է Սիրիայի թեման, և այն քննարկելու կարիքն ակնհայտ է։ Սոչիի քննարկումները լինելու են հանրային քննարկումների գործնական շարունակությունը՝ կարծում է փորձագետը։
Չի բացառվում նաև որոշումների կամ համաձայնությունների ձեռք բերումը Հարավային Կովկասի, մասնավորապես՝ հայ-թուրքական հարաբերությունների և Արցախի հարցի վերաբերյալ։
Միքայելյանը կարծում է, որ Էրդողանի՝ նախօրեին ակնարկած հնարավոր կարևոր որոշումները վերաբերում են հենց տարածաշրջանում Թուրքիայի ներկայությանը։ Ըստ փորձագետի՝ այս հարցը պետք է լինի հայկական դիվանագիտության օրակարգի առանցքում։
«Պետք է մեր ամբողջ գործիքակազմը կիրառենք, մեր դաշնակիցները պետք է տեղյակ լինեն մեր մոտեցումներին։ Եթե մեր օրակարգը չունենանք, եթե ինքներս մեր շահը չձևակերպենք, ապա, առավել մեծ է հավանականությունը, որ որոշումներն առանց մեզ կընդունվեն»,-ասում է «Կովկաս» ինստիտուտի փորձագետը։