ԿարևորՀասարակություն

Պոլսոյ մէջ այս հարստութիւններուն պահակներն ենք․ 14 դպրոց, 11 գերեզմանոց, 33 եկեղեցի. Տիգրան Ալթուն


14 դպրոց, 11 գերեզմանոց, 33 եկեղեցի։ «Մենք Պոլսոյ մէջ այս հարստութիւններուն պահակներն ենք»,-ըսաւ Հանրային Ռատիոյի տաղավարին մէջ զրուցակիցս՝ Պոլսահայ գործարար, հասարակական գործիչ՝ Տիգրան Ալթուն։

Ատենով մը 150․000 հայ բնակչութիւն ունեցող Պոլիսը այսօր ունի միայն 50․000 հայ բնակչութիւն։

Պոլսոյ հայութիւնը 2 խումբի կը բաժնուի․ բնիկ պոլսահայեր եւ 40-50-ական թուականներուն ջարդէն յետոյ գաւառներէն, գիւղերէն Պոլիս տեղափոխուած հայեր։ Բարերարները իւրաքանչիւր դպրոցի կողքին 5-6 շէնք նուիրած են, որպէսզի անոնց վարձքով այդ դպրոցները կարողանան շարունակել աշխատիլ։

Կուսակցութիւններ չեն ունեցած, եկեղեցիները եղած են միակ հաւաքատեղիները հայութեան, ինչպէս նաեւ Սանուց միութիւնները։
«Մենք Հայաստան կուգանք վերալիցքաւորուելու, նորոգուելու ․․․մեր ներսը այդ ճնշումը կայ»,- ըսաւ, երբ հարցուցի թէ, արդեօ՞ք հայերը Պոլսոյ մէջ ապահով կը զգան։
Տիգրան Ալթուն առաջին անգամ Հայաստան կու գայ 1972-ին։

«Այդ օրերը տեսնողներուն համար այսօր Հայաստանը դրախտ մըն է»․ մեր հիւրը կը հաւատայ , որ նոյնիսկ պատերազմէն ետք ալ Հայաստանը շատ լաւ ապագայ պիտի ունենայ։ 29,000 ք․քմ տարածութիւնը փոքր տեղ մըն է 10 միլիոն հայերուն համար։

Ան յոյս ունի, որ սփիւռքահայերը վերադառնան Հայաստան, որովհետեւ հայ մնալու միակ ճարը Հայաստանն է․․ պէտք է աշխատինք, որ մեր յոյսերը իրականանան։ Ալթուն ոչ միայն հայերուն համար, այլեւ օտարներուն համար նոյնիսկ Հայաստանը ցանկալի տեղ մը դառնալուն կը հաւատայ։

Ալթունի Մեծ հայրը ծնած էր Եոզկաթ, հայրը՝ Կեսարիա, իսկ ինք՝ Էրզրում։ Հինգ տարեկանին հայրը զինք Պոլիս կը տանի, որպէսզի զաւակը հայկական դպրոց ուղարկեր։ Իսկ Ալթունին Կիպրոսի Մելգոնեան վարժարան ուղարկելը մինչեւ հիմա առեղծուած էր։ «Հայրս ուրկէ՞ ուր պիտի գիտնար Կիպրոսը, Մելգոնեանը․․»։

Այդ սերունդը մեծ հրաշք մը գործած էր, ջարդէն ետք ծնած հայրը հայերէն նոյնիսկ չգիտնալով, անուս, ոտքը բոպիկ մարդիկը սերունդ մը հասցուցին, իրենք թուրքերու հետ ապրեցան, բայց իրենց երախաները ձեւով մը հայացուցին։
Մելգոնեան վարժարանին մէջ Տիգրան Ալթուն կը գտնէ իր երկրորդ կէսին․ «Մելգոնեանի մէջ իրար տեսնելով սիրահարուեցանք»,- կ՛ըսէ ան։

Մինչեւ 2016 թուական Տիգրան Ալթուն սեփականատէրն էր Tower կոչուող օդանաւային ընկերութեան , Երեւան-Պոլիս Երեւան չուերթներու ուղղութեան, այսօր ալ ան յոյս յայտնեց , որ մօտիկ ժամանակին այդ արտօնութիւնը պիտի յաջողին վերականգնել։
«Պետութիւններ մշտապէս բարեկամներ կամ թշնամիներ չեն կրնար մնալ,- ըսաւ Ալթուն։

Օր մը կրնայ ըլլալ , թերեւս 30 տարի յետոյ Հայաստանիւ եւ Ատրպէյճանի շահերը նոյնանանան Թուրքիոյ դէմ կամ Հայաստանի եւ Թուրքիոյ շահերը նոյնանան Ատրպէյճանի դէմ։ Մենք հարեւան ենք հարեւան ալ կը մնանք, ոչ Թուրքիան կրնայ ծախել երթալ , ոչ ալ Հայաստանը»,- շարունակեց Ալթուն։
Ինչ կը վերաբերի Հայաստան- սփիւռք կապերու մասին։

«Սփիւռքը պէտք է օգնէ Հայաստանին, որպէսզի Հայաստանը զարգանայ եւ վաղն ալ Հայասատնը օգնէ սփիւռքին»,- պատասխանեց մեր հիւրը ամենայն հանդարութեամբ ու խոհեմութեամբ։ Ալթունի կարծիքով՝ Հայաստանը դեռ սփիւռքին հետ պէտք եղածին չափ կապ չի կրցաւ հաստատել։

Ցուցադրել ավելի
Back to top button