ԿարևորՀասարակություն

Պարզունակ կադրային հարցն ազգամիջյան լույսի ներքո ներկայացնելը զավեշտալի է. Գարեգին Խումարյան

Պարզաբանում Հանրային ռադիոյի Եզդիերեն հաղորդումների խմբագրությունում ընթացող վերադասավորումների  և «Եզդիների ազգային միություն» հ/կ-ի ղեկավար Խդր Հաջոյանի 17.09.21-ի հայտարարության կապակցությամբ:

Մեր երկրում գործող եզդիական կառույցներից մեկի՝ «Եզդիների ազգային միություն» հասարակական կազմակերպության ղեկավար Խդր Հաջոյանը նախօրեին հանդես է եկել հայտարարությամբ, որում պնդում է, թե Հայաստանի Հանրային ռադիոընկերությունը փակման է տանում եզդիների համար տրվող հաղորդումների խմբագրությունը: Այս կապակցությամբ հայտնում եմ հետևյալը:

Եզդիների համար տրվող հաղորդումների խմբագրությունը և ընդհանուր առմամբ Արտասահմանի և ազգային փոքրամասնությունների համար տրվող հաղորդումների բաժինը 2019 թվականին Հանրային ռադիոյում մեկնարկած բարեփոխումների առանցքում է: Այդ բարեփոխումների ընթացքում

  1. կրկնապատկվել էր եզդիների համար մայրենի լեզվով տրվող ռադիոհաղորդումների ծավալը (այս պահին տևողությունը ժամանակավորապես կրճատված է խմբագրությունում ընթացող վերադասավորումների պատճառով)
  2. գործարկել է եզդիերեն լեզվով լրատվական կայք,
  3. ստեղծվել է եզդիական ժողովրդական երաժշտությանը նվիրված շուրջօրյա համացանցային ռադիոկայան,
  4. ստեղծվել է եզդիների պատմությանն ու մշակույթին նվիրված վիդեոհանդես,
  5. զգալիորեն բարձրացվել է խմբագրության աշխատակիցների աշխատավարձը:

Ուզում եմ հատուկ ընգծել, որ բարեփոխումների մեկնարկից առաջ 2019 թ.-ի ապրիլ ամվսա դրությամբ Հանրային ռադիոն եզդիերեն լեզվով արտադրում էր միայն 30 րոպե տևողությամբ ռադիոհաղորդում: Եվ ներկայում Հանրային ռադիոյի կողմից եզդիներին մայրենի լեզվով մատուցվող մեդիածառայությունների ծավալն ու բնույթը աղերս չունի նախկին վիճակի հետ, որը, ցավոք սրտի, եղել է անփոփոխ տասնամյակներ շարունակ:

Եզդիների համար արտադրվող մեդիակոնտենտի ներկայիս ծավալները բնավ վերջնական հանգրվանը չեն, և նախատեսվում է էլ ավելի լայնացնել այդ ուղղությամբ տարվող աշխատանքները:

Սակայն 2020-2021 թվականներին բարեփոխումների ընթացքը հասավ մի կետի, երբ պարզ դարձավ, որ առկա կադրային լուծումներով ավելին անելը և բարեփոխումները վերջնական հանգրվանին հասցնելն անհնար է: Առաջ գնալու համար անհրաժեշտ են տեխնոլոգիական պատրաստվածության սկզբունքորեն այլ աստիճանի, ցանցային մտածողությամբ, 21-րդ դարի տեղեկատվական միջավայրին առավել համահունչ մոտեցումներով թարմ ուժեր: 

Ներկայում այդ մարդիկ գալիս են փոխարինելու նախկին անձնակազմին: Եվ վստահ եմ՝ մենք հաջողելու ենք:

Այս փոփոխությունների ընթացքում, այո, ընկերությունը ստիպված էր հրաժեշտ տալ իր երկու աշխատակիցներին, ում հետ ամենայն հավանականությամբ մենք, այո, հանդիպելու ենք դատարանում:

Մերժում եմ Հանրային ռադիոընկերության Եզդիների համար տրվող հաղորդումների խմբագրությունում փորձաշրջան անցնող երիտասարդ մասնագետներին վիրավորելու և պիտակավորելու փորձերը, որոնք առկա են Խդր Հաջոյանի ֆեյսբուքյան գրառման մեջ:

Սատարում եմ գործընկերներիս և կոչ անում չտրվել սադրանքների:

Կասկածի տակ եմ առնում առանձին վերցրած մեկ հասարակական կազմակերպության ղեկավարի՝ մեր երկրի բոլոր եզդիների անունից հանդես գալու իրավաչափությունը, իսկ  պարզունակ կադրային հարցը ազգամիջյան լույսի ներքո ներկայացնելու փորձերը համարում եմ զավեշտական:

Եզդիերեն խմբագրության մեր ապագա աշխատակիցները, բնականաբար, նույնպես եզդի են:

Բացարձակապես անընդունելի եմ համարում Հանրային ռադիոընկերության վրա ճնշում բանեցնելու այս և այլ ապարդյուն փորձերը:

Գարեգին Խումարյան
Գործադիր տնօրեն
Հայաստանի Հանրային Ռադիո

Ցուցադրել ավելի
Back to top button