ԿարևորՄշակույթ

Մարթին Եորկանցին հետ զրոյց՝ Հայաստան գալու մասին

Սերունդներ հասակ առած են Մարթին Եորկանցի հրաշալի ուսուցողական երգերով , ո՞վ չի գիտեր Այբ Բեն Գիմը, Ճկոյթիկը, կամ Ղարաբաղցին․․սիրուած երգիչ Եորկանց Հայաստանի Հանրային ձայնասփիւռին միացաւ հեռախօսակապով Ֆրանսայի Քանն քաղաքէն։

«Դժբախտաբար երկու տարիէ ի վեր Հայաստան չեմ այցելած, սակայն Հայաստանի բոլոր լուրերուն կը հետեւիմ․ ես Հայաստանին սիրահարուած երգիչ մըն եմ», -ըսաւ ան։ Հայաստանը Եորկանցի երգերուն  ներշնչման աղբիւր եղած է , ան կը կարծէ , որ սոյն թուականի Սեպտեմբերին կը ժամանէ Հայաստան։ «Մէկուկէս տարիէ ի վեր տունիս մէջ կ՛երգեմ , որովհետեւ ամէն ինչ արգիլուածէ Քովիտի պատճառով»։

Երբ հարցուցի, թէ ինչն է գաղտնիքը, որ ինք միշտ երիտասարդ կը մնայ,- Ես երաժշտութիւն շատ կը սիրեմ , ամբողջ կեանքս երգելով անցած է, սա Աստուծոյ տուած մէկ պարգեւն է երեւի, առանց երգելու կեանքս անկարելի կ՛ըլլայ, — պատասխանեց ան։  Մարթին Եորկանց կ՛երգէ հայերէն, իտալերէն, ֆրանսերէն , սպաներէն եւ անգլերէն։ Համաճարակի այս օրերուն, երբ աշխարհը սահմանափակումներու մէջ է․ յայտնի երգիչն ալ այսպէս գտած է հնարքը․ «Ամէն օր կ՛երգեմ տանս մէջ եւ կը ձայնագրեմ,  յետոյ կը տեղադրեմ դիմատետրի էջիս  կամ YouTube-ին , ուրիշ ճար չունիմ․․» ։

Մեր զրուցակիցը  յանձնարարեց, որ ամէն մարդ պատուաստուի Քովիտի դէմ, որպէսզի պաշտպանուին համաճարակէն։ Ան պնդեց, որ շատ կը փափաքի այցելել Հայաստան ու համերգով հանդէս գալ, յոյսով , որ Սեպտեմբերին իրականացնէ իր փափաքը։

Մարթին Եորկանց ծնած  է Պոլիս, յաճախած է Մխիթարեան դպրոցը, մինչ այժմ ալ ան լաւ կապեր ունի աշխարհի տարբեր ծայրերը ապրող մխիթարեանցիներուն հետ։ Մեր զրոյցի ընթացքին ինք եւս ուզեց իմանալ մեր Ռատիոյի մասին եւ Արեւմտահայերէն լուրերու մասին, ես մեծ ուրախութեամբ յայտնեցի , որ արդէն երեք տարի կ՛ընէ , որ մենք ամէն կէսօր ժամը 14․00-ին Արեւմտահայերէն լուրեր կը սփռենք ամենօրեայ դրութեամբ Հայաստանի Հ1 հանրային ձայնասփիւռէն։

Յայտնի երգիչը  1988 թուականէն ի վեր կու գայ Հայաստան , լաւ կը խօսի նաեւ արեւելահայերէն, եւ պատեհ առիթը համարելով ողջունեց հայաստանի փոքրիկները եւ աշխարհի փոքրիկները տածելով իր սէրը հանդէպ փոքրիկներուն եւ ծնողներուն նկատմանբ։

Ան մաղթեց , որ Հայաստան վերագտնէ իր երբեմնի օրերը , Քովիտէն ու պատերազմէն յետոյ եւ եզրափակեց մեր զրոյցը՝ Ճկոյթիկ եւ Հայ երգ, հայ երգ քեզ եմ սիրահար․․ երգելով։

Ցուցադրել ավելի
Back to top button