ՀՀ Շրջակա միջավայրի նախարարին կից Հասարակական խորհրդի «Ջրային ոլորտի» աշխատանքային խմբի անդամներն օրերս իրենց անհանգստությունը հայտնեցին՝ «ՀՀ ջրային օրենսգրքում փոփոխություններ կատարելու մասին» օրենքի նախագիծի շուրջ, որով նախատեսվում էր թույլատրել ԲՀՊՏ-ների պահպանման գոտիներում փոքր ՀԷԿ-երի կառուցումը։
Մի շարք ՀԿ-ներ նամակով դիմեցին ԱԺ նախագահին և համապատասխան գերատեսչությունների ղեկավարներին՝ պահանջելով ԱԺ քննարկմանը չներկայացնել օրենքի նախագիծը, քանի որ այն հղի է ռիսկերով և վտանգներով։
Բնապահպան Ինգա Զարաֆյանի խոսքով՝ ԲՀՊՏ-ների բուֆերային գոտում փոքր ՀԷԿ-երի կառուցումը կարող է վտանգել ամբողջ տարածքի էկոհամակարգի կայունությունը, բուսական և կենդանական աշխարհի պահպանությունը, քանի որ փոքր ՀԷԿ-երի կառուցման դեպքում խախտվելու է տեղի լանդշաֆտը, խողովակաշարերի անցկացման դեպքում հնարավոր են ծառահատումներ և սողանքային երևույթների ակտիվացում:
Գետի ջուրը խողովակաշարով անցկացնելու դեպքում կփոխվի գետի հիդրոլոգիական ռեժիմը, տեղի կլիման, ինչն իր հերթին բացասաբար կանդրադառնա տարածքի բուսական և կենդանական աշխարհի վրա։