Ավելի քան մեկ ամիս լիբանանահայ ռազմագերի Վիգեն Էլչեքջյանի ընտանիքը լուր չունի նրանից
Վիգեն Էլչեքջյանը միակ լիբանանահայը չէ, որ գերեվարվել է Ադրբեջանում: Ընտանիքի տեղեկություններով՝ գերեվարվածների մեջ Հակոբ անունով ևս երկու լիաբանանահայ կա։ Հակառակորդը նրանց որպես վարձկան է ներկայացնում և արդեն դատավարություն է սկսել։
Հայ ռազմագերիների հարցով արդեն 7 ամիս զբաղվող «Բրիտանահայերի մարդասիրական խմբի» հիմնադիր անդամ Հասմիկ Սեյմուրը «Ռադիոլուր»-ի հետ զրույցում ասել է, որ հիմա փնտրում են երկու Հակոբների հարազատներին, որ այդ ուղղությամբ նույնպես աշխատանք տարվի: Հասմիկի խոսքով՝ ամեն օր ու ամենուր պետք է բարձրացնել գերիների խնդիրը, ընդգծել, որ հայրենիքը պաշտպանելու ու այնտեղ բնակվելու եկած անձինք ոչ թե վարձկաններ են, այլ հայրենասերներ:
«Ռադիոլուր»-ը տեսակապով զրուցել է նաև նոյեմբերի 10-ից գերության մեջ գտնվող Վիգենի դստեր՝ Քրիստիան Էլչեքջյանի ու նրա եղբոր՝ Սարգիսի հետ։
Վերջին անգամ հոր հետ Քրիստիանը 1 ամիս առաջ է խոսել։ Դստերն ասել է, որ, հնարավոր է, երեք ամիս անց իրեն ազատ արձակեն: Վիգենին ուղարկված վերջին նամակի պատասխանը ընտանիքը դեռ չի ստացել, մեկ ամիս է, որ Կարմիր Խաչը որևէ լուր նրա պահման պայմանների մասին չի հայտնել:
Դստեր ցանկությունը մեկն է՝ հայրը օր առաջ վերադառնա և կապն այլևս նամակով չլինի: