Միջազգային հեղինակավոր Ճարտարապետների միջազգային միության նախագահի պաշտոնին հավակնում է Ադրբեջանի Ճարտարապետների միության նախագահը։ Մինչդեռ հայկական մտավորական, ճարտարագիտական շրջանակներում մտահոգված շեշտում են՝ պետք է ամեն կերպ բացառել այլ ազգի մշակութային ժառանգության հանդեպ արհամարհանքով ու մասնագետին ոչ բնորոշ ոչ կոռեկտ պահվածքով աչքի ընկնող մարդու նշանակումն այդ պաշտոնում։
Ալեքսանդր Թամանյանի անվան ճարտարապետության թանգարան-ինստիտուտի տնօրեն Մարկ Գրիգորյանը կոչով դիմել է միջազգային հանրությանն ու ճարտարապետներին՝ ակնկալելով, որ այդ շրջանակում հայկական փաստարկները լսելի կդառնան։
Թույլ չտալ, որ Ճարտարապետների միջազգային միության նախագահ ընտրվի Ադրբեջանի ճարտարապետների միության նախագահ Էլբայ Գասիմզադեն․ հարցի կարեւորությունն ընդգծում է Ալեքսանդր Թամանյանի անվան ճարտարապետության թանգարան-ինստիտուտի տնօրեն Մարկ Գրիգորյանն ու շեշտում՝ սա այն մարդն է, որը ողջունել է Արցախի հայկական հուշարձանների ոչնչացումը։
«Դադիվանքն անվանել է աղվանական հուշարձան, պնդում է, թե հայկական հետք գոյություն չունի, թե հայերը «քոչվոր ժողովուրդ» են եւ որեւէ պատմական հուշարձանի իրավունք չունեն»,- ասում է Մարկ Գրիգորյանը:
Առաջիկայում Ճարտարապետների միջազգային միության նախագահի ընտրությունն է։ Ինչու է կարեւոր, որ դրա ղեկավարի պաշտոնում չլինի Ադրբեջանի ներկայացուցիչ։ Միությունը միջազգային հասարակական կազմակերպություն է, որը ներկայացնում է ավելի քան մեկ միլիոն ճարտարապետի 124 երկրից։ Բաղկացած է հինգ կառույցից։ Հետխորհրդային երկրների կառույցում ընդգրկված է նաև Հայաստանը։
Հնարավոր թեկնածուներից մեկն Ադրբեջանի ճարտարապետների միության նախագահ Էլբայ Գասիմզադեն է։ Հայաստանի ճարտարապետների միության նախագահ Մկրտիչ Մինասյանը համակարծիք է՝ պետք է կանխվի այս մարդու ներկայությունը կառույցի ադմինիստրատիվ մակարդակում։ «Ռադիոլուրի» հետ զրույցում Մինասյանը տեղեկացնում է՝ Ճարտարապետների միությունն ԱԳՆ մակարդակով իր առարկությունները ներկայացրել է ընտրող հանձնաժողովին։
«ՀՀ ԱԳՆ աշխատակից, մասնագիտությամբ ճարտարապետ Կարինե Դանիելյանը հեռավար մասնակցել է այդ նիստին ու ներկայացրել այն ավերածությունները, որոնք կատարվել են Արցախում 44-օրյա պատերազմից հետո։ Ներկայացրել ենք մեր առարկություններն Էլմարի ընտրության առումով՝ պարզաբանելով, որ վերջինս բացահայտ հայտարարել է, որ պետք է ջնջվի հայկական հետքը։ Իսկ դա վայել չէ ճարտարապետին։ Մասնագիտական առումով նման հայտարարություններ չպետք է արվեն»։
Մինասյանը, սակայն, միաժամանակ նկատում է, որ երկու տարի առաջ Ճարտարապետների միջազգային կոնգրեսը հենց Բաքվում անցկացրեց իր համաժողովը։ Հետևաբար պատահական չէ, որ առաջադրվել է Էլբայ Գասիմզադեի թեկնածությունը, ընդ որում՝ նրա ընտրվելու շանսերը մեծ են։ Որքանո՞վ Հայաստանի առարկությունները կազդեն ընտրության արդյունքի վրա՝ Մինասյանը դժվարանում է պատասխանել։
«Միջազգային հարթակներում այդպես չէ, որ հենց Հայաստանի անունը լսեն, միանգամից կողմ քվեարկեն մեզ»,–ասում է Մինասյանը։
Ալեքսանդր Թամանյանի անվան ճարտարապետության թանգարան-ինստիտուտի տնօրեն Մարկ Գրիգորյանն իր հերթին նկատում է՝ մինչև ընտրությունների ելքը պետք է այս մասին բարձրաձայնել միջազգային բոլոր հարթակներում։ «Որևէ դեպքում նա չպետքէ ընտրվի այդ միության նախագահ»․ Գրիգորյանի դիրքորոշումն է։
«Էդ մարդն իրեն թույլ է տալիս հայատյաց ծանր հայտարություններ, որոնք համեմատելի են նացիզմի հետ»,–ասում է Գրիգորյանը։
ՄԱԿ-ի տարբեր գործակալություններ, այդ թվում՝ ՅՈՒՆԵՍԿՕ-ն, Առողջապահության համաշխարհային կազմակերպությունը, Առևտրի համաշխարհային կազմակերպությունը Ճարտարապետների միջազգային միությունը ճանաչում են որպես բնագավառի միակ ընկերությունը։ Ու պատահական չէ, որ մեծապես կարեւովում է միջազգային այսպիսի կառույցի նախագահի պաշտոնում ճարտարապետին ոչ վայել, մշակութային ժառանգության արժեքների հանդեպ մասնագիտորեն ոչ կոռեկտ մոտեցում ունեցող մարդու նշանակումը։
