Արմավիրի մարզի Էջմիածին քաղաքի ավագանու անդամներից երկուսն արդեն 2 տարի 9 ամիս բոյկոտել են ավագանու նիստերը: Ավագանու 2 անդամն էլ նախկին քաղաքապետ Կարեն Գրիգորյանի հետ փոխկապակցված անձինք են և ավագանու նիստերին չեն մասնակցել նրա հրաժարականից հետո: Բացակայություններն անհարգելի են, իսկ ավագանին դեռ չի քննարկել ավագանու նրանց լիազորությունների դադարեցման հարցը: Արտակ Պողոսյանն ու Արման Գրիգորյանը չեն մասնակցել շուրջ 38 նիստի:
Արմավիրի մարզի Էջմիածին քաղաքային համայնքի ավագանու 2 անդամ Արման Գրիգորյանն ու Արտակ Պողոսյանն արդեն 2 տարի 9 ամիս չեն մասնակցում ավագանու նիստերին: Էջմիածնի քաղաքապետարանի աշխատակազմի քարտուղար Գրիգոր Հարությունյանը տեղեկացրեց, որ ավագանու անդամների բացակայությունը անհարգելի է քանի որ բացակայություննների վերաբերյալ ոչ մի հիմնավորում ոչ գրավոր, ոչ էլ բանավոր չեն ստացել:
Ավագանու նիստերի վերաբերյալ ծանուցումներն անպատասխան էին մնացել:
«25.02.2021թ թիվ 529 գրությամբ ծանուցել ենք Էջմիածին քաղաքային համայնքի ավագանու անդամ Արտակ Պողոսյանին, տեղեկացրել ենք, որ 2021թ մարտի 5-ին, ժամը 15:00-ին կայանալու է համայնքի ավագանու արտահերթ թիվ 3 նիստը, միաժամանակ հայտնել ենք, որ նիստի ժամանակ քննարկվելու է ավագանու անդամի նիստերին անհարգելի պատճառով բացակայությունների հարցը: Որպես կանոն, մշտապես ծանուցագրերն ուղարկվում են, բայց հետ են վերադառնում՝ չստացված տարբերակով»,- ասում է Գրիգոր Հարությունյանը:
Նույնը ձևով տեղեկացվել էր նաև Արման Գրիգորյանը, բայց ծանուցագիրը նորից չստացված վերադարձվել էր: Այսինքն՝ ավագանու անդամներ Արտակ Պողոսյանն ու Արման Գրիգորյանը անհարգելի բացակայել են ավագանու նիստերից: Էջմիածնի քաղաքապետարանի աշխատակազմի ղեկավար Գրիգոր Հարությունյանը նշում է, որ ավագանու անդամների բացակայությունը հաճախ քվորում չի ապահովում:
Արման Գրիգորյանը նախկին քաղաքապետ Կարեն Գրիգորյանի եղբայրն է, իսկ Արտակ Պողոսյանը՝ քրոջ ամուսինը: Նախկին քաղաքապետի հետ փոխկապակցված անձինք հրաժարվել են ավագանու նիստերին մասնակցելուց՝ քաղաքապետ Կարեն Գրիգորյանի հրաժարականից հետո, 2018թ հունիսից: Արտակ Պողոսյանն ու Արման Գրիգորյանը ավագանու անդամ էին ընտրվել 2016թ սեպտեմբերի 18-ին: Ավագանու նիստերի բոյկոտմամբ նրանք խախտել են ՏԻՄ օրենքի 21-րդ հոդվածի դրույթները, որով սահմանված են ավագանու անդամի պարտականությունները՝ մասնակցել նիստերին, հանդիպել բնակչությանը, ընտրողներին տեղեկացնել ավագանու աշխատանքի մասին, մասնակցել ավագանու կողմից անցկացվող քաղաքացիների ընդունելություններին և այլն: Ավագանու անդամների լիազորությունների դադարեցումը ի՞նչ ընթացակարգ ունի. պարզաբանում է Արմավիրի մարզպետարանի իրավաբանական բաժնի պետ Լիաննա Հարությունյանը.
«Հարցադրումը վերաբերում է ՀՀ ՏԻՄ օրենքի 22-րդ հոդվածի 1-ին մասի 7-րդ կետին, այսինքն՝ մեկ տարվա ընթացքում նա անհարգելի պատճառով բացակայել է ավագանու նիստերի կեսից ավելին: Այս պարագայում, նույն հոդվածի 2-րդ մասով հստակ սահմանված է՝ 7-րդ կետում սահմանված դեպքում՝ նիստին ներկա ավագանու անդամների ձայների 2/3-ով ընդունվում է համայնքի ավագանու անդամի լիազորությունների վաղաժամկետ դադարեցնելու մասին որոշում՝ ավագանու, կամ նիստը գումարելու անհնարինության դեպքում ավագնու մյուս անդամները կազմում են համապատասխան արձանագրություն, որը հաստատվում է ներկա ավագնու անդամների 2/3-ով (երկու երրորդով)»:
Էջմիածնի ավագանու անդամ Արտակ Պողոսյանը վերջին անգամ ավագանու նիստին մասնակցել էր 2018թ ապրիլի 10-ին, իսկ Արման Գրիգորյանը՝ 2018 թ մայիսի 22-ին: Ավագանու մյուս անդամներից փորձեցի տեղեկանալ իրենց բացակա գործընկերների մասին.
«Անձամբ ես չեմ հետաքրքրվել, չգիտեմ ինչպես կարելի է կապվել, հեռախոսահամար չունեմ, բայց յուրաքանչյուր հարց պետք է լուծվի իրավական հարթության մեջ: Այլ տրամադրությամբ չենք տրամադրվել, չկա այդպիսի բան, բոլորս էջմիածնեցի ենք»:
«Իրենք քաղաքում չեն»: «Հանրապետությունում էլ չեն, դրա համար կապ չեն կարողացել հաստատել»:
Երկու տարի ինն ամիս ավագանու նիստերից անհարգելի պատճառով բացակայած ավագանու 2 անդամի լիազորությունների դադարեցման հարցը Էջմիածնի ավագանին դեռ չի քննարկել, իսկ Էջմիածին քաղաքի ավագանու լիազորությունների ժամկետի ավարտին մնացել է 5 ամիս:
