Հակառակ ադրբեջանական բողոքներին ու մեղադրանքներին՝ Բեռլինի միջազգային «Բեռլինալե» կինոփառատոնը պաշտպանեց Լեռնային Ղարաբաղի հակամարտությանը նվիրված «Սեւ այգի Արցախ» ֆիլմի ցուցադրությունը փառատոնի շրջանակներում։
Ֆիլմը բեմադրել են պաղեստինցի Այրին Անաստասին և իրանցի Ռենե Գաբրին: Ֆիլմի հեղինակներն անդրադարձել են տասնամյակներ ընթացող հակամարտությանը և Բախի հնչունների տակ պատմել իրենց պատմությունը։
Ֆիլմը համացանցում հիմնականում ադրբեջանցիների և թուրքերի հակազդեցությանն է արժանացել, մեղադրել են հատկապես հեղինակների այն մոտեցումը, որ 1990-ական թվականներին Լեռնային Ղարաբաղի հակամարտությունը ազատագրման և ինքնորոշման պայքար էր, իսկ վերջին պատերազմը Ադրբեջանի բռնապետի ներխուժում:
Փառատոնի ղեկավարությունը մերժել է ֆիլմը ծրագրից հանելու պնդումները և պաշտոնական հայտարարություն տարածել անդրանիկ ցուցադրության մասին:
Փառատոնի կազմակերպիչները նշել են, որ հասկանում են ֆիլմի՝ Ադրբեջանի և Հայաստանի հակամարտության բարդ խնդիրների ներկայացման և ցավալի հիշողությունների շուրջ քննադատությունները, սակայն ֆիլմարվեստի ձայնը լռեցնելն անհնար է: