Գյումրու դրամատիկականում գտել են ստեղծված իրավիճակը հաղթահարելու սեփական տարբերակը․2021-ին բեմադրելու են թեթև գործեր, դրամաներին տուրք չեն տալու, ավելի շատ խոսելու են սիրո ու համերաշխության մասին։ Թատրոնն այս մոտեցմամբ է սկսում 155-րդ եթերաշրջանը։ Երեկ Գյումրու դրամատիկականում առաջնախաղ էր։
Գյումրու դրամատիկականը 155-րդ թատերաշրջանը սկսում է «Քեյսը» ներկայացմամբ։ Դահլիճը լեփ լեցուն է, հանդիսատեսը տեղավորվել է նաև աստիճաններինն : Վերջապես բացվել են բեմի՝ երկար փակ մնացած վարագույրները: 2021-ին Գյումրու դրամատիկականում ավելի շատ կատակերգություններ են բեմադրվելու՝ ասում է թատրոնի տնօրեն, գեղարվեստական ղեկավար Լյուդվիգ Հարությունյանը։
«Թատրոնի խաղացանկը պիտի լինի ավելի պարզ, թեթև, ավելի շատ կատակերգություններ կլինեն, ավելի շատ կխոսենք սիրո, համերաշխության մասին: Գոնե թատրոնը պետք է փորձի դրական լիցքեր փոխանցել հանդիսատեսին, դրա համար սկզբունքորեն դրամաներ չենք պատրաստվում բեմադրել 2021-ին»:
Թատրոնի գեղարվեստական ղեկավար Լյուդվիգ Հարությունյանի ու երիտասարդ դրամատուրգ Բաբկեն Զաքարյանի պիեսը՝ «Քեյսը», փողի փորձությանը դիմանալու մասին է, այն մասին, թե ինչպես է այն փոխում մարդկային դիմագիծը։ Ներկայացման հերոսն այդ փորձության առաջ կանգնած արվեստագետն է՝ ասում է ռեժիսորը։
«Մենք բոլորս խորհուրդ ենք տալիս, մտնում ես ՖԲ, բոլորը խորհուրդ են տալիս, թե ինչ անենք, ոնց անենք։ Մեր հերոսն էլ է խորհուրդ տալիս, բայց խորհուրդ տալը հեշտ է, իսկ ինչ ես անում դու, երբ հերթը քեզ է հասնում․ ներկայացումը հենց սրա մասին է: Խոսում ենք բարոյական արժեքների մասին, քանի դեռ մեր գրպանները դատարկ են: Բայց արդյո՞ք պահպանում ենք այդ սկզբունքները, երբ հնարավորություններն ավելանում են»:
Մենք պարտավոր ենք ստեղծագործել՝ ասում է Լյուդվիգ Հարությունյանը։ Պատերազմի ընթացքում հարազատի կորստի վիշտը սրտում՝ նա փորձում է թատրոնում ու քաղաքում տրամադրություն փոխել:
«Որովհետև թատրոնը բուժում է, իմ օրինակով վստահ կարող եմ ասել: Այս պահին ինձ համար շատ կարևոր, շատ մտերիմ 2 երիտասարդ գերի են, բայց ես ստեղծագործում եմ: Ինչ է նշանակում՝ ես ոչինչ չանեմ ու ասեմ՝ պարտվել եմ: Ոչ, ես հավատում եմ, իմ խմբի հետ ես պիտի աշխատեմ: Վստահ եմ, որ մեր տղաները հետ են գալու, ու վաղն ավելի լավ է լինելու»:
2021-ին Մհեր Մկրտչյան փոքր բեմն են վերանորոգել, ավելի ժամանակակից ոճով կահավորել, մարտի 13-ին էլ առաջին ներկայացումը կբեմադրեն: Այս տարի Հայաստանի սահմաններից դուրս գալ չեն կարողանա, բայց հյուրախաղերով մայրաքաղաք ու մարզեր կմեկնեն: