Երևանի հենց կենտրոնում` Պուշկին և Թումանյան փողոցների շենքերով պարփակված է ս. Զորավոր Աստվածածին եկեղեցին։ Հենց այստեղ է Քրիստոսի աշակերտներից Անանիա առաքյալի գերեզմանը, այստեղ է գործել Սուրբ Անանիայի անապատը, որն ունեցել է գրչության հրաշալի կենտրոն։
Այս անապատում է մինչև կաթողիկոս դառնալը ծառայություն մատուցել Մովսես Տաթևացին։ Սուրբ Զորավորը ստալինյան քանդարարության շրջանում փրկված կառույցներից է, նաև ապացույցը, որ Երևանը միջնադարում զարգացած քաղաք է եղել իր՝ ուրույն մշակութային և հոգևոր կյանքով։
