Անկախ այն հանգամանքից, թե որ ճանապարհով կհանգուցալուծվի իրավիճակը՝ վարչապետի հրաժարականի՞, թե՞ արտահերթ խորհրդարանական ընտրությունների, Զինված ուժերի գործողություններին պետք է տրվի իրավական գնահատական՝ կարծում է Միջազգային և անվտանգության հարցերի հայկական ինստիտուտի ասոցացված փորձագետ Արտաշես Խալաթյանը։ Նրա խոսքով՝ Զինված ուժերի գլխավոր շտաբի այսօրվա հայտարարությունը կոպտորեն խախտում է Սահմանադրության 14-րդ հոդվածը, համաձայն որի՝ Զինված ուժերը պետք է քաղաքական չեզոքություն և զսպվածություն պահպանեն։
Փորձագետը ստեղծված իրավիճակում առանցքային է համարում հանրապետության նախագահի և խորհրդարանական մեծամասնության դերակատարությունը։
«Իշխանությունը պետք է երկու բան անի՝ ստանձնի հանձնառություն սեղմ ժամկետներում արտահերթ ընտրություններ անցկացնելու, միաժամանակ ձեռնարկի կտրուկ գործողություններ իրավակարգը պաշտպանելու ուղղությամբ։ Եթե այս քայլերը չարվեն, կունենաք կամ քաոս, կամ դիկտատուրայի հաստատում»,- ասել է փորձագետը։
