IDEX-2021 ցուցահանդեսում Հայաստանի մասնակցության վերաբերյալ ԲՏԱ նախարարության պարզաբանումը

IDEX-2021 միջազգային ռազմարդյունաբերական ցուցահանդեսում Հայաստանի մասնակցության, մասնավորապես՝ հայկական ընկերությունների տաղավարում ցուցանմուշների բացակայության վերաբերյալ, ԲՏԱ նախարարությունը տեղեկացնում է հետևյալը.

Ցուցանմուշնեըի տեղափոխությունը կազմակերպվել է նախապես, այն հաշվարկով, որպեսզի սահմանված ժամկետում՝ մինչև ցուցահանդեսի բացումը, առաքանին տեղում լինի: Առաջացած լոգիստիկ խնդիրների հետևանքով՝ հայկական ռազմական տեխնիկայի ցուցանմուշները չեն հասել Աբու Դաբի։

Տեղի ունեցածի հանգամանքները պարզելու նպատակով՝ նախարարի հրամանով սկսվում է ծառայողական քննություն։

Չնայած առաջացած խնդիրներին, հայկական ընկերություններն արդյունավետ աշխատում են ցուցահանդեսում պատշաճ ներկայանալու համար. կապեր են հաստատում միջազգային գործընկերների հետ՝ բացահայտելով նոր հնարավորություններ և շուկաներ, ուսումնասիրում են միջազգային փորձը ռազմական տեխնիկայի ոլորտում։

Ավելի վաղ սոցցանցերում միջազգային ռազմարդյունաբերական ցուցահանդեսում հայկական ընկերությունների տաղավարի լուսանկարն էր տարածվել, որում բացակայում են հայկական արտադրության ցուցանմուշները: Համեմատության համար հրապարակվել էր նաև ադրբեջանական տաղավարի լուսանկարը:

Տես նաև՝ IDEX-2021-ի շրջանակներում ՀՀ ԲՏԱ նախարարը հանդիպել է ԱՄԷ պաշտպանության պետնախարարի հետ