ԿարևորՀասարակություն

Լեհ քաղաքական գործիչը Ալիևին է ուղարկել հայերի դեմ ադրբեջանական ռազմական հանցագործությունների վերաբերյալ հրապարակման առաջին օրինակը

Լեհ քաղաքական գործիչ Թոմաշ Լեխ Բուչեկը Արցախում հայերի դեմ Ադրբեջանի հանցագործությունների մասին հրապարակման առաջին օրինակը ուղարկել է Ադրբեջանի նախագահ Իլհամ Ալիևին:

Նա հրապարակմանը կցել է նաև Իլհամ Ալիևին ուղղված նամակ, որում հորդորել է ազատ արձակել հայ գերիներին:

Նամակում ասվում է.

«Նախ և առաջ դիմում եմ ձեզ Ադրբեջանում բանտարկված հայ ռազմագերիներին վերադարձնելու խնդրանքով: Նրանց տանը սպասում են հուսահատ ընտանիքները՝  մայրեր, կանայք և երեխաներ: Դրանց ազատ արձակումը կդառնար պատմական մեծ նշանակություն ունեցող փաստ ՝ աշխարհին ի ցույց դնելով խաղաղության ձգտումը:

Ես նաև խնդրում եմ գերեվարվածների ճշգրիտ թիվը և միջազգային կազմակերպությունների միջոցով տեղեկություններ տրամադրել նրանց առողջական վիճակի վերաբերյալ:

Նաև կոչ եմ անում ձեռնարկել իրավական քայլեր Ադրբեջանի այն քաղաքացիների նկատմամբ, ովքեր ղարաբաղյան հակամարտության ընթացքում ռազմական հանցագործություններ են գործել ` խախտելով միջազգային կոնվենցիաները և օրենքները, ինչպես նաև Ադրբեջանի օրենքները:

Հարգանքներով՝ Թոմաշ Լեխ Բուչեկ»: 

Անցյալ շաբաթ Հայաստանի հանրային ռադիոյին տված հարցազրույցում Թոմաշ Լեխ Բուչեկը ասել էր, որ ինքը հազարավոր սպառնալիքներ է ստացել Ադրբեջանից ՝ հայերի դեմ ադրբեջանական ռազմական հանցագործությունների վերաբերյալ բրոշյուր հրատարակելու մտադրության համար: Բազմաթիվ փորձեր են արվել կոտրել սոցիալական կայքերում նրա հաշիվները:

Back to top button