ԿարևորՌադիոլուր

Արեւմտահայերէն լուրեր Յունուար 29, 2021

Քննչական կոմիտէի Երեւանի քննչական վարչութեան ծանր յանցագործութիւններու քննութեան բաժնին մէջ կը կատարուի քննութիւն , Հայաստանի կառավարութեան շէնքը զաւթելու փորձ կատարելու համար։ Յունուար 28-ին` ժամը 17:00-ի սահմաններուն, Երեւանի Հանրապետութեան հրապարակին մէջ նախապէս յայտարարուած հաւաքի ընթացքին, խումբ մը անձերու կողմէն, նախնական համաձայնութեամբ, կառավարության շէնքը զաւթելու փորձ կատարուած է : Նախաքննութեան ընթացքին 5 անձ ձերբակալուած է՝ կառավարութեան շէնքը զաւթելու փորձ կատարելու կասկածանքով: Կը կատարուի նախաքննութիւն,-կը յայտնէ Քննչական կոմիտէն:

Պաքուէն հայրենիք վերադարձան 5 գերիներ, որոնք Շիրակի մարզի 62 զինուորներու խումբէն են։ Ատրպէյճանի մէջ անոնց դէմ յարուցուած քրէական մեղադրանքները բարդացուցած էին զինուորները վերադարձնելու գործընթացը, բայց այն, որ առաջին խումբը արդէն Հայաստան հասաւ, կը նշանակէ, որ գործընթացը յառաջ կ՛երթայ: Գերութենէ վերադարձած զինուորներուն վիճակը բնական նկատուեցաւ. անոնք փոխադրուեցան հիւանդանոց՝ ընդհանուր քննութեան համար։ Ռուսիոյ խաղաղապահ զօրակազմի հրամանատար, զօր. Ռուստամ Մուրատով յայտնեց, որ Հայաստան մէկ գերի յանձնած է Ատրպէյճանին՝ հինգ հայ գերիներու դիմաց:

Իրանի Արտաքին գործոց նախարարին Տարածաշրջանային այցի շրջածիրէն ներս՝ Պոլսոյ օդանակայանին մէջ , լրագրողներուն հետ ճեպազրոյցին, Մուհամմատ Ճաուատ Զարիֆ ըսած է ․«Ատրպէյճան, Ռուսաստան, Հայաստան և Վրաստան կատարած այցերուս ընթացքին, այդ երկիրներու բարձրաստիճան պաշտօնեաներուն հետ մանրամասնօրէն քննարկած եմ այս հարցը: Թուրքիոյ մէջ նոյնպէս քննարկելու ենք հարցը, յատկապէս Լեռնային Ղարաբաղի տարածաշրջանին մէջ տեղի ունեցած վերջին իրադարձութիւններէն յետոյ տարանցման և փոխադրութեան ոլորտներուն մէջ համագործակցութեան հաստատման համար ենթահող ստեղծելու հարցը»:

Back to top button