Օժանդակ սարքերը կտրամադրվեն մինչև հաշմանդամության խումբ ստանալը
Կառավարության հունվարի 14-ի որոշմամբ` պատերազմում վիրավորում ստացած անձինք օժանդակ սաքեր կարող են ստանալ նաև զինգրքույքով կամ հանրային ծառայությունների համարանիշով։
«Ռադիոլուրի» խնդրանքով պարզեցված ընթացակարգը ներկայացրել է Աշխատանքի և սոցիալական հարցերի նախարարության Հաշմանդամություն ունեցող անձանց հիմնահարցերի բաժնի գլխավոր մասնագետ Արփինե Հայրապետյանը։
«2020 թվականի սեպտեմբերի 27-ին Արցախի հանրապետության դեմ սանձազերծած պատերազմի ընթացքում վիրավորում ստացած զինծառայողների և քաղաքացիական անձանց վերականգնողական գործընթացը խթանելու նպատակով սահմանվել է պարզեցված ընթացակարգ, որի համաձայն նշված անձինք մինչև հաշմանդամության կարգ ստանալը կարող են ձեռք բերել աջակցող միջոցներ նախարարության բուժատեխնիկական հանձնաժողովի տված եզրակացության հիման վրա», — նշել է Արփինե Հայրապետյանը։
Նրա խոսքով՝ վիրավորում ստացած զիծառայողները և քաղաքացիական անձինք աջակցող սարքեր, օրինակ` սայլակ կամ քայլակ ստանալու համար գործող կարգավորմամբ պետք է ունենային հաշմանդամության խումբ: Հաշվի առնելով այն փաստը, որ գործող կարգավորումներով հաշմանդամության խումբ ստանալը որոշակի բժշկական գործընթաց է պահանջում, ընթացակարգը պարզեցվել է․ օժանդակ սարքերը կտրամադրվեն մինչև հաշմանդամության խմբի տրամադրման գործընթացն ավարտելը: