ԿարևորՌադիոլուր

Արեւմտահայերէն լուրեր Յունուարի 11, 2021

Արցախեան 44-օրեայ պատերազմէն ետք այսօր առաջին անգամ Հայաստանի վարչապետն ու Ատրպէյճանի նախագահը կը հանդիպին Մոսկուայի մէջ Ռուսաստանի նախագահի նախաձեռնութեամբ եւ մասնակցութեամբ:

Եռակողմ հանդիպումի օրակարգին , ըստ Քրէմլինի տարածած հաղորդագրութեան, Նոյեմբեր 10-ին Հայաստանի, Ռուսաստանի եւ Ատրպէյճանի ղեկավարներու Լեռնային Ղարաբաղի վերաբերեալ եռակողմ յայտարարութեան իրականացման ընթացքի քննարկումն է եւ տարածաշրջանին մէջ առկայ խնդիրներու լուծման ուղղութեամբ յետագայ քայլերը։

Բացի այդ, ըստ նոյն հաղորդագրութեան, յատուկ ուշադրութիւն կը դարձուի ռազմական գործողութիւններու հետեւանքով տուժած շրջաններու բնակիչներուն օգնութիւն ցուցաբերելու, ինչպէս նաեւ առեւտրա-տնտեսական եւ երթեւեկութեան ապաշրջափակման եւ զարգացման հարցերուն։

ՀՀ վարչապետի մամլոյ խօսնակ՝ Մանէ Գէոորգեանը երէկ տեղեկացուց, որ եռակողմ հանդիպումին նախապէս ծրագրուած օրակարգը տնտեսական բնոյթ ունի, որը կը վերաբերի տարածաշրջանային հաղորդակցութեան բացման, միջազգային բեռնափոխադրումներու իրականացման, այդ թիւին մէջ՝ Հայաստանէն դեպի Ռուսաստանի Դաշնութիւն, Իրանի Իսլամական Հանրապետութիւն, ինչպէս նաեւ Հայաստանի կեդրոնական հատուածներէն դէպի Սիւնիքի մարզ:

Հայկական կողմին համար սկզբունքային է գերիներու վերադարձի, ատրպէյճանցիներու թիկունքին մնացած մեր զինուորներու որոնողափրկարարական աշխատանքներու, զոհուածներու մարմիններու յայտնաբերման, անյայտ կորսուածներու ճակատագիրը պարզելու խնդիրը:

Նշենք, որ, բացի եռակողմ հանդիպումէն , կը նախատեսուին նաեւ Փութին-Փաշինեան, Փութին- Ալիեւ երկկողմ հանդիպումներ: Տեղի կ՛ունենայ աշխատանքային ճաշ, որմէ ետք ՀՀ վարչապետը կը վերադառնայ Երեւան: Այսօր առաւօտեան «Հայրենիքի փրկութեան շարժման» նախաձեռնութեամբ խումբ մը քաղաքացիներ փորձած են փակել դէպի «Զուարթնոց» օդակայան տանող ճանապարհը՝ վարչապետին թույլ չտալու մեկնիլ Մոսկվա: Սակայն վարչապետի շարասիւնը անարգել հասած է «Զուարթնոց» օդակայան։

Back to top button