Արմավիրում ասֆալտապատվել են ավելի քան 30 տարի չբարեկարգված բակերն ու ճանապարհները
Արմավիր քաղաքում գրեթե ավարտվեցին սուբվենցիոն ծրագրով նախատեսված ասֆալտապատման աշխատանքները: Ծրագրով նախատեսվել էր հիմնանորոգել շուկայի փողոցն ու հարող Շահումյան փողոցի մի հատվածը, ինչպես նաև բազմաբնակարան 12 շենքերի բակեր, որի համար պահանջվել է ավելի քան 216 մլն դրամ: Սուբվենցիայով ծախսերի 45 տոկոսը ներդրել է կառավարությունը, մնացածը վճարվել քաղաքի բյուջեից
Այս տարի Արմավիր քաղաքում ճանապարհաշինական լայնածավալ աշխատանքներ իրականացվեցին համայնքի և պետական բյուջեի համաֆինանսավորմամբ: Սուբվենցիոն ծրագրով քաղաքի կենտրոնական հատվածում շարունակեցին բարեկարգել ու տեսքի բերել ճանապարհները: Այս անգամ շինարարական աշխատանքները հիվանդանոցից ձգվեցին շուկայի փողոց և հատվեցին հիմնանորոգվող մայրուղուն: Սա ամենամամարդաշատ ու առևտրի սրահներով, կրպակներով ծանրաբեռնված փողոցն է, որտեղ մայթեզրերին բացօթյա վաճառվում են գյուղատնտեսական ապրանքներ:
Սեպտեմբերի սկզբին այս փողոցում սկսեցին քանդել ճանապարհը: Մարդիկ ապամոնտաժեցին մայթերի ապօրինի երկաթյա կոնստրուկցիաները, որպեսզի չխանգարեն առուների կառուցմանը: Պատերազմի ընթացքում աշխատանքները չդադարեցին:
Ճանապարհաշինական ընկերության աշխատակից Քաջիկ Հովհաննիսյան. «Հին եզրզքարերը քանդել են, որ նորը տեղադրենք, դրանից հետո բետոնացման աշխատանանքեր ենք կատարելու և կսկսենք ասֆալտապատման պրոցեսը»:
Ճանապարհի կառուցման համար միայն ջրեհեռացման համակարգի կառուցումը բավարար չէր: Խմելու ջրագծերի վաղեմության ժամկետն անցել էր և հաճախացել ջրագծերի վթարները, որի պատճառով քանդվում էր ասֆատե ծածկույթը: Դա բացառելու նպատակով հիմնանորոգվող ճանապարհներում խմելու ջրի երկաթե խողովակները փոխարինեցին պլաստմասսայով:
Բացի կենտրոնական փողոցից սուբվենցիայով բարեկարգվեցին Արմավիր քաղաքի ծայրամաս համարվող հարավ-արևմտյան թաղամասի Բաղրամյան փողոցի բազմաբնակարան 12 շենքերի բակերը: Այստեղ նույնպես փոխվել են խմելու ջրագծերը, կառուցվել անձրևաջրերի հեռացման ցանց և ասֆալտապատվել:
«Շատ լավ գործ արեցին, ջրագծերն էլ փոխեցին: Էն վախտ ինչ էր, անձրև էր գալի չէինք կարում էթայինք տուն, ցեխերի միջով, ջրերի միջով, տրորելով: 30 տարի ասֆալտ չէին արել ստեղ, ամեն տարի էն քաղաքապետը ասում էր՝ մայիսին կանեմ, հունիսին կանեմ, էթում էր ու ոչ մի բան»:
«Կարևորը էլ չեմ ցեխոտվում, նորմալ աշխատանքի եմ գալիս, քեզ մարդ ես զգում: Ինչքան տարրական բան է, բայց մենք ինչքան ուրախ ենք, ինչերից ենք զրկված եղել, ցեխերի միջով, կեղտոտ…»:
Սլավոնական Պեյաձև 12 շենքերի բակերի փոսերն ու ցեխերը մնացին անցյալում, որից ավելի շատ ուրախացել են երեխաները.
«Շատ լավա, որ սարքին, անձրևաջրերց ու ցեխերից պրծանք էլի: Մեր երազանքն էլ էդ էր, որ սաղ սարքվեր»:
«Առաջ, որ սամակատ էի քշում, ընկնում էի, փոսեր էր ,հող, հիմա էլ չեմ ընկնում»:
Արմավիրի քաղաքապետ Դավիթ Խուդաթյանը նշեց, որ ասֆալտապատված հատվածներում անցկացվում է գիշերային լուսավորություն: Հաջորդ տարում այս շենքերի երեխաներին նոր անակնկալ է սպասվում․
«Սուբվենցիայի շրջանակում նախատեսված չի խաղահրապարակի տեղադրում, բայց քաղաքապետարանն այլ միջոցներով խաղահրապարակ տեղադրելու է, ծառատունկ է կազմակերպելու, բակը բարեկարգվելու է էդ տեսանկյունից: Ասֆալտապատման աշխատանքը պատշաճ որակով է կազմակերպվել, սահմանված կարգով փորձաքննության է ենթարկվելու և գումարը փոխանցվելու է դրական պատասխան ստանալուց հետո»:
Բակերն ու ճանապարհները բարեկարգվեցին, իսկ հարթ փողոցներում վարորդները արագություն զարգացնելով փորձարկում են իրենց հմտությունները: Բնակիչները բարձրացնում են արգելապատնեշի խնդիրը: