Այսօր առավոտից անհետ կորածների ծնողներն ու հարազատները բողոքի ցույց են կազմակերպել մայրաքաղաք Ստեփանակերտում: Նրանք փակել են կենտրոնական՝ Ազատամարտիկների պողոտան: Հայաստանից և Արցախից հավաքված ծնողների հետ հանդիպել է Արցախի մարդու իրավունքների պաշտպանը:
Ստեփանակերտի կենտրոնական փողոցում հավաքված ծնողներն ու հարազատներն ասում են, որ ճարահատված Ստեփանակերտում փողոց են փակել։ Ժամանակն անցնում է, իսկ իրենք ճակատից տուն չեկած զինվորի մասին լուր չունեն: Հապաղումը կարող է նաև ճակատագրական լինել:
Հավաքվածների հետ հանդիպել է Արցախի Հանրապետության Մարդու իրավունքների պաշտպանը: Խնդրին Արտակ Բեգլարյանը ծանոթ է: Պատերազմի առաջին օրից փաստահավաք առաքելությամբ են զբաղված. այդ թվում նաև հակառակորդի մոտ հայտնված տղաների ճակատագրով են հետաքրքրվում, նյութեր հավաքում, համագործակցում այլ կառույցների հետ:
Այնպես չի, որ արդյունք չկա, քանի որ 400-ից ավելի մարմին արդեն հանվել կամ փոխանակվել է, այլ հարց է, որ կոնկրետ` ընդ որում՝ շատ դեպքերով, արդյունք դեռեւս չկա: Ադրբեջանը միտումնավոր ձգձգում է գործընթացը:
Պաշտպանն ասում է, որ Արցախի և Հայաստանի իշխանությունները պետք է բոլոր ջանքերն ու լծակները գործադրեն, որ մարդասիրական խնդիրներն արագ լուծվել։
Արցախից որոնողական աշխատանքներին մասնակցում են արտակարգ իրավիճակների պետական ծառայության փրկարարական ջոկատները, սակրավորների խմբերը: Մյուս կողմերն են Ադրբեջանը, ռուսական խաղաղապահներն ու Կարմիր խաչի միջազգային կոմիտեի ներկայացուցիչները: Այսօրվա դրությամբ հիմնական աշխատանքը զոհված զինծառայողների մարմինների որոնման ու փոխանակման ուղղությամբ է: Արտակարգ իրավիճակների պետական ծառայության սպա Հունան Թադևոսյանի խոսքով` այդ աշխատանքներն ավարտվել են միայն Շուշի քաղաքի տարածքում:
Այսօր առաջին անգամ որոնումներն ընդգրկել են Հադրութ քաղաքի հարակից Տյաք գյուղը:
Հենց այս ուղղություններում է, որ ամենաշատն են անհայտ ճակատագրով զինվորները: Բանակցությունները, ինչպես նաև որոնման աշխատանքները ամենօրյա են: Ստեփանակերտում բողոքի ակցիային մասնակցող անհետ կորածների ծնողներն ու հարազատները պաշտոնյաների բացատրություններից բավարարված չեն: Ասում են, որ ճանապարհ փակելուց չեն հրաժարվելու այնքան ժամանակ, մինչև կոնկրետ պատասխան չստանան:
