Ֆիզիկայի կիրառական պրոբլեմների ինստիտուտում կատարված գիտական աշխատանքները տնտեսության տարբեր ոլորտներում ներդնելու առաջարկները շատ են։ Դրանց մեծ մասը, սակայն, մնացել է գիտական կենտրոնի կամ մասնաճյուղ լաբորատորիաների պատերի ներսում։ Այստեղ որոշել են, որ պետական որևէ կառույցի դուռ չեն թակելու և ինքուրույն իրենց առաջարկները կիրառության մեջ կդնեն։
Թագավարակի համավարակը խանգարեց ֆիզիկայի կիրառական պրոբլեմների ինստիտուտին նշելու 1980 թ. հիմնադրված գիտական այս կենտրոնի 40-ամյակը։
Հյուրեր էին սպասվում տարբեր երկրներից՝ հիմնականում ՌԴ-ից։ Պլանները չեղարկվեցին, սակայն ինստիտուտում հույս ունեն, որ տարեվերջին կկարողանան կազմակերպել միջոցառումը։
Հրաչյա Ներսիսյան 25 հասցեում գտնվող ինստիտուտն, որն ի սկզբանե կատարում էր հիմնականում կրկնակի նշանակության աշխատանքներ, պետք է ունենար ավելի մեծ տարածք, և մուտքը ինստիտուտ պետք է սահմանափակված լիներ:
«Գիտությամբ զբաղվում են միայն նրանք, ովքեր սիրահարված են գիտությանը»,- ասում է ֆիզմաթ գիտությունների դոկտոր, պրոֆեսոր, ՀՀ ԳԱԱ թղթակից անդամ Արտակ Մկրտչյանը։
Պարզվում է՝ միայն սերը գիտության հանդեպ բավարար չէ։ Այս կենտրոնի աշխատանքներին ուշի-ուշով հետևում է նաև տնօրենի շունը։
