Թուրքիան գերմանական ռազմական օդանավին արգելել է իր տարածքով Հայաստան թռչել․ Der Spiegel
Հուլիսի վերջին Քյոլնից Երևան ուղևորվող գերմանական ռազմական ինքնաթիռին արգելվել է հատել Թուրքիայի օդային տարածքը՝ նախօրեին հայտնել է գերմանական Der Spiegel պարբերականը:
Հրապարակման համաձայն՝ օդային երթևեկության թուրք կարգավարները, առանց բացատրության, հրաժարվել են թույլ տալ, որ գերմանական ինքնաթիռը թռչի երկրի օդային տարածքով՝ ստիպելով Airbus 310-ին վերադառնալ Քյոլն։
Ըստ պարբերականի, գերմանացի զինվորականներն այդ միջադեպը որպես Անկարայի կողմից կանխամտածված սադրանք են որակում:
Ինքնաթիռն ուղևորվում էր Երևան հայ խաղաղապահներին Գերմանիա փոխադրելու։ Զինվորականները Աֆղանստան գործուղվելուց առաջ պետք է վերապատրաստում անցնեին Գերմանիայում։
Արդյունքում, օգոստոսի կեսերին, գերմանական օդուժը ստիպված է եղել շատ ավելի երկար ճանապարհ անցնել Ռուսաստանի տարածքով`հայ զինծառայողներին տեղափոխելու համար։