Սևանի փոխարեն, եթե ճահիճ ունենանք, Հայաստանը կկորցնենք, «Ռադիոլուրի հյուրասրահ»-ում իր անհանգստությունն է հայտնել աշխարհագրական գիտությունների դոկտոր-պրոֆեսոր Կարինե Դանիելյանը: Սևանա լճի ծաղկումը Էկոլոգների համար նորություն չէ, այն ծաղկել է 64թ.-ից ի վեր, ասում է Դանիելյանը։
Պատճառը տասնամյակների անփույթ վերաբերմունքն է: Անհանգստությունը մնում է նույնը. ճահճացման վտանգը գնալով կավելանա, եթե օր առաջ քայլ չարվի:
Կարինե Դանիելյանը կարծում է, որ ջրի մակարդակի դանդաղ բարձրացումը նույնպես խաթարել է Սևանա լճի էկոհամակարգը։
Ստեղծված վիճակը մարդու գործունեության հետանք է, վստահ է Կանաչների կուսակցության նախագահ Արմենակ Դովլաթյանը: Ըստ նրա՝ ձկնապաշարի նվազումը կանխում է լճի ջրի անհրաժեշտ զտումը՝ ֆիլտրումը: Դովլաթյանը մտահոգված հարցնում է՝ ինչո՞ւ չեն կանխում որսագողությունը:
Կանաչների կուսակցության նախագահն ասում է, որ յուրաքանչյուր նոր իշխանություն ու ոլորտի նոր նախարար սկսում է ուսումնասիրությունից։ Որքա՞ն կարելի է ուսումնասիրել՝ ասում է։
Մասնագետները վստահ են, որ Սևանի փրկության հանձնաժողով է պետք ստեղծել:
Հայաստանի բնապահպանության համար Սևանի խնդրից պակաս կարևոր չէ հանքարդյունաբերությունը։ Պետությունը պետք է օգտագործի իր բոլոր լծակները հանքարդյունաբերությունը հարկային դաշտ բերելու և օրենսդրական առկա երկակի ստանդարտները վերացնելու համար՝ ասում են նրանք:
