«Ադրբեջանցիներն ակտիվացել են բոլոր հարթություններում. բոլոր ուղղություններով աշխատում են և փորձում հայերին հաղթել՝ դա անելով նաև ամերիկյան քաղաքականության մեջ»,- մեկնաբանելով ԱՄՆ Կոնգրեսի Ներկայացուցիչների պալատի կողմից օրերս ընդունված բանաձևը, որում տեղ է գտել «Ադրբեջանի գրավյալ տարածքներ» ձևակերպումը, նշում է միջազգայնագետ Սուրեն Սարգսյանը։
Փորձագետը՝ չնայած հայկական լոբբիստների ակտիվ աշխատանքին, թուրք-ադրբեջանական տանդեմին դիմակայելու հարցում անհրաժեշտ է համարում լրացուցիչ ֆինանսական աջակցության ներգրավումը՝ համայնքային կառույցների խողովակներով։ «Երկրորդ ուղղությունը լոբբիստների կարողությունների զարգացումն է, որպեսզի թուրք–ադրբեջանական լոբբիստական տանդեմին հարվածները լինեն ավելի արդյունավետ»,- ասում է։
Անդրադառնալով հայ–ամերիկյան հարաբերություններին՝ Սուրեն Սարգսյանը փաստում է, որ Թրամփի նախագահության օրոք Վաշինգտոնի քաղաքականությունը մեր տարածաշրջանում նախկինի պես ակտիվ չէ։ Թեև փորձագետը դա համարում է Թրամփի վարչակազմի առանձնահատկություններից մեկը, սակայն նշում է, որ Երևանի կողմից էլ նախաձեռնողականության պակաս է զգացվել։
Միջազգայնագետը Քանիե Ուեսթի հաղթանակը ԱՄՆ նոյեմբերյան ընտրություներին անհավանական է համարում, թեև չի բացառում, որ 2024-ին ռեփերի առաջադրման դեպքում հենց Քիմ Քարդաշյանը կդառնա ԱՄՆ առաջին տիկին։