Հասարակություն

Մեր ծնողները կ՛երազէին հայրենիքը տեսնել ազատ, անկախ․ Մակի Քէշիշեան

Հայկական Բարեգործական Ընդհանուր Միութեան Քլոտիա Նազարեան բժշկական կեդրոնի ակնաբոյժ բժշկուհին է մեր հիւրը բացառիկ հարցազրոյցի, որ Հալէպէն հաստատուած է Հայաստան։

«Երբ Հայաստան եկանք քանի մը համախոհ բժիշկներով՝ բոլորս ալ Հայաստանի շրջանաւաւտներ, ուզեցինք հիմնել կեդրոն մը, որ կարենանք ձրիաբար բժշկական օգնութիւն ցուցաբերել մեր ժողովուրդին, որոնք թողած ամէն բան իրենց ետին տեղափոխուեցան հայրենիք պատերազմի պատճառով։ ՀԲԸ Միութիւնը՝ հաւատարիմ իր սկզբունքին, փութաց ձեռք մեկնել եւ բանալ այս կեդրոնը, ինչպէս նաեւ Քլոտիա Նազարեան բարերար ընտանիքի  հարսը նիւթապէս օժանդակեց սոյն դարմանատան բացման», -կ՛ըսէ բժշկուհին։

«Երեք տարի առաջ բացուեցաւ կեդրոնը, որուն գործող տնօրէնն է հալէպահայ բժիշկ, սրտաբան Գրիգոր Տարագճեանը, գործող բժիշկներն են  կնկաբոյժ բժիշկ Մերուժան Քիրիշեանը , բժիշկ Վարանդ Կիրակոսեանը, որ փոխարինեց մեզմէ առյաւէտ հեռացած մանկաբոյժ Ժան Պէշլեանին եւ ես։ Վերջերս քիթ կոկորդի մասնագէտ մըն ալ ունեցանք հայաստանցի Էլիա Մուրատեանը»։ Բժշկուհին աւելցուց, որ կեդրոնը Հալէպ կը բուրէ , այդ պատճառով ալ հալէպահայ հիւանդները իրենց սրտին հարազատ կը զգան՝ յաճախելով այս կեդրոնը․ անոնք բժիշկներուն ծանօթ են Հալէպէն։ Կեդրոնը չի մերժեր որեւէ հիւանդի, թէկուզ արաբ դիւանագիտական աշխատողներուն եւ  լիբանանահայերուն։

Քլոտիա Նազարեան կեդրոնը համաձայնութիւն կնքած է Իզմիրլեան հիւանդանոցին հետ։ «Մեր հիւանդներէն որևէ մէկը եթէ վիրահատութեան կարիքն ունի , մենք ուղեգիր կուտանք եւ Սփիւռքի Յանձնակատարի գրասենեակի միջնորդութեամբ կ՛ուղարկենք Առողջապահութեան նախարարութիւն, եւ պետութիւնը միշտ դրական պատասխան կու տայ ինչպէս նաեւ ՀԲԸ Միութիւնը կը հասնի օգնութեան»։ Իսկ դեղերը որպէս օգնութիւն  կ՛ուղարկուին Ֆրեզնոյէն խումբ մը հայ բժիշկներու կողմէն ։

Մենք խօսեցանք Հալէպի Ճեպեճեան հիւանդանոցի մասին, որուն վերջին հայ տնօրէնը եղած է Մակիի ամուսինը՝ բժիշկ Կարօ Հաճնլեանը։ «Մեծն Բժիշկ Ճեպեճեանի երազն էր , որ հիւանդանոցը գործէ նոյնիսկ իր մահուընէ ետք, այդպէս ալ եղաւ մինչեւ հիմա հիւանդանոցը կը գործէ եւ մեծ ծառայութիւն կը մատուցէ հայ ժողովուրդին»։ Մեր հիւրը ցաւով յայտնեց, որ Հալէպի մէջ հայ ակնաբոյժ չի մնաց , բոլորը գաղթեցին։

Արեւելքի մէջ 60-ական թուականներուն այդքան ալ համոզիչ չէր աղջիկ զաւակը ուղարկել Հայաստան, թէկուզ ուսումնառութեան պատճառով, սակայն Մակի Քէշիշեանի ծնողները չափազանց հայրենասէր եղած են․ «Մայրս հերոսուհի էր, իր երեք զաւակներն ալ ուղարկեց հայրենիք ուսման նմատակով»։ Բժշկուհին աւելցուց, որ անոնք ընտանեօք կը հաւաքուէին ժամը 9-ին լսելու «Երեւանն է խօսում»-ը եւ մասամբ յագեցնելու իրենց հայրենիքի կարօտը։ Մարաշցի ծնողներս կ՛երազէին հայրենիքը տեսնել ազատ ու անկախ՝ կ՛ըսէ բժշկուհին։

Back to top button