Մեր դիվանագիտությունը պետք է հարձակողական լինի, այլ ոչ թե պասիվ և պաշտպանողական՝ ադրբեջանական ԱզերԹԱջ-ի փոխանցմամբ ասել է Ադրբեջանի նախագահ Իլհամ Ալիևը՝ ելույթ ունենալով գործադիր մարմնի նիստում, որում քննարկվել են 2020 թվականի առաջին կիսամյակի սոցիալ-տնտեսական արդյունքները:
Նա դժգոհել է արտաքին քաղաքական գերատեսչության ղեկավարի աշխատանքից, նշելով, որ իր կողմից տրված ցուցումներին նախարարությունը չի հետևում, արդյունավետ չի աշխատում:
«Բայց արդյո՞ք մենք տեսնում ենք այս ցուցումների իրականացումը: Շատ դեպքերում մենք չենք տեսնում: Դժբախտաբար, վերջերս մեր դիվանագիտությունը չի համընկնում մեր երկրի առաջընթացի հետ: Որոշ դեպքերում նա զբաղված է անիմաստ քայլերով և խոսակցություններով: Ի՞նչ բանակցություններ կարող են լինել COVID-19- ի հետ կապված մի երկրի հետ, որի հետ մենք հակամարտության մեջ ենք: Սա անհեթեթություն է»,-ասել է նա, ընդգծելով, որ առանց խաղաղության համաձայնագրին ընդառաջ քայլերի, համագործակցության եզրեր չի տեսնում Հայաստանի հետ: Նման համագործակցությունը կարող է լինել միայն ի վնաս իրենց:
«Հայաստանի վարչապետն ասում է, որ «Ղարաբաղը Հայաստան է, և վերջ»: Ես պատասխանել եմ դրան: Բայց արդյո՞ք արտաքին գործերի նախարարությունը ինչ-որ կերպ արձագանքել է դրան: Չեմ լսել: Ադրբեջանի ժողովուրդը նույնպես չի լսել: Արտաքին գործերի նախարարությունը լռում է: Ասել եմ, որ մինչև Հայաստանի հետ բանակցություններում առաջընթաց չարձանագրվի, չի կարելի որևէ համագործակցության մասին խոսել: Իսկ նրանք քննարկում էին COVID- ը»:
Ալիևն ասել է, որ վերջին օրերին անընդմեջ շփվում է իր օգնական Հիքմեթ Հաջիևի հետ և հրահանգներ է տալիս, սակայն չի կարողացել գտնել արտաքին գործերի նախարարին: Նա ստիպված է եղել հարցնել վարչապետ Ալի Ասադովին ու պարզել, որ Մամեդյարովն աշխատում է տնից:
«Բոլորս ՝ և՛ ղեկավարությունը, և՛ հանրությունը, պետք է իմանան, թե որն է իրական պատկերը, որպեսզի ճիշտ քայլեր ձեռնարկվեն: Մենք պետք է ամեն օր, ամեն րոպե պաշտպանենք պետության շահերը»,- նշել է Ալիևը:
