Ընդունելության մեկ քննություն հանձնելու ՝ համավարակով պայմանավորված որոշումը մեծացրել է դիմորդների ակտիվությունը․ ավելացել է ոչ միայն դիմորդների, այլեւ՝ մեծահասակ դիմորդների քանակը։
«Օրինակ՝ այս տարի ԲՈՒՀ ընդունվելու համար դիմել է 1964 թ․ ծնված քաղաքացի», -«Ռադիոլուրի հյուրասրահ»-ում ասել է ԳԹԿ փոխտնօրեն Կարո Նասիբյանը և նշել, որ տարիքով մեծ դիմորդները հիմնականում ընտրում են արվեստի բուհերը։
Ընդունելության քննությունների մեկնարկից առաջ ԳԹԿ փոխտնօրենի հետ զրուցել ենք քննությունների կարգի ու համավարակով պայմանավորված փոփոխությունների մասին։
Կարո Նասիբյանը հաստատել է ԿԳՄՍ նախարար Արայիկ Հարությունյանի՝ ավելի վաղ արած այն հայտարարությունը, որ ջերմություն ունենալու դեպքում դիմորդը չի մասնակցի քննական պրոցեսին։
«Այդ դիմորդներին երկրորդ հնարավորություն չի տրվելու, ու նրանք չեն կարող քննություն հանձնել»,–ասել է Նասիբյանը ու նշել, որ բացառություն կլինեն այն դիմորդները, որոնք առողջական այլ խնդիրներ ունենալու մասին բժշկական տեղեկանք կներկայացնեն։
Այս տարի կարևոր փոփոխություն է եղել նաև դիմում-հայտերում։ Եթե նախկինում առաջին անվճար հայտն էր գերակա, ապա հիմա անվճարի հետ գերակա է նաև վճարովին։ Ի՞նչ է սա նշանակում։
«Դիմորդը, ենթադրենք, դիմել է իրավագիտություն մասնագիտության համար, ուրեմն՝ առաջին տողով նշել է և՛ վճարովին, և՛ անվճարը։ Այդտեղից դուրս մնալու դեպքում նա երկրորդ, երրորդ, չորրորդ և այլ հայտերով կարող է ընդունվել միայն այն դեպքում, եթե դրանցով նշված մասնագիտություններում թափուր տեղեր կան»,- ասել է Նասիբյանը։
