Կորոնավիրուսի դեմ պայքարում պատրաստի բանաձևեր չկան՝ ասում է բժշկական գիտությունների թեկնածու, համաճարակաբան Արման Բադալյանը։
«Հրաշք բանաձեւ չկա։ Որոշումները կայացվում, փոփոխությունները ներդրվում են քայլ առ քայլ։ Սա երկարատեւ պրոցես է»,-նշում է մասնագետը։
Նրա գնահատմամբ ՝ այս փուլում ամենակարևորը իրավիճակի վերահսկողությունն է։
«Կարող են մահերը շատ լինել, բայց կարեւորը վերահսկողությունն է։ Եթե այն լինի, ավելի հեշտ կհաղթահարենք։ Համաճարակային իրավիճակն , ըստ քարտեզների, հիմա ավելի ցրված է, քան նախորդ փուլերում։ Պետք է փորձենք խմբավորել, որ կարողանանք վերահսկել»։
Ըստ Բադալյանի ՝ բարդացել է նաև իրավիճակի կառավարելիությունը։
Դիմակների կրումից հետո վարակի տարածումը կառավարելի դարձնելու երկրորդ հիմնական միջոցը, նրա կարծիքով, թեստավորման ծավալների ավելացումն է։ Դա հնարավոր կդարձնի կոնտակտավորների վաղաժամ հայտնաբերումը՝ ասում է համաճարակաբանը։
«Եթե այս քայլերը պատշաճ արվեն, մենք կկարողանանք կտրել համաճարակաբանական կապերը ու վարակի տարածվածության խմբավորման տարբերակին հասնել»։
«Ռադիոլուրի հյուրասրահ»-ում Արման Բադալյանի հետ զրուցել ենք նաև այն մասին, թե ինչ հաշվարկներ են այն մոտեցման հիմքում, որ հիվանդության նահանջին պետք է սպասել բնակչության 30-35 տոկոսի վարակվելուց հետո։