Կառավարությունը հաստատել է կորոնավիրուսի տնտեսական հետևանքների չեզոքացման քսաներկուերորդ միջոցառումը։ Այն փորձելու է աջակցել համավարակի շրջանում աշխատանքը կորցրած քաղաքացիներին։
Աշխատանքի ու սոցիալական հարցերի նախարարը կառավարության նիստում մանրամասնել է, թե որքան է լինելու աջակցությունը և ում է վերաբերելու։
Երկու մասնագիտություն, երկուսն էլ՝ կորոնավիրուսի պայմաններում չպահանջված։ Զրուցակիցս՝ Անուշիկը, աշխատանքը կորցրել է համավարակի օրերին։ Այժմ աշխատանք է փնտրում։
«Կորոնավիորուսի պատճառով կորցրել եմ աշխատանքս։ Աշխատում էի պարի խմբակում, երեխաները չէին հաճախում, ուստի փակվեց։ Նորից աշխատանք եմ փնտրում, չգիտեմ կգտնեմ թե չէ, քանի որ Հայաստանում հեշտ չէ աշխատանք գտնելը։ Մեզ խորհուրդ են տալիս, որ մի քանի մասնագիտություն ունենանք, ես նաև դիմահարդար եմ, բայց սա էլ չի օգնում, որ կարողանամ գումար վաստակել, քանի որ այժմ մարդիկ լուրջ խնդիրների առջև են կանգնած։ Ստացվում է, որ իմ երկու մասնագիտություններն էլ ինձ չեն օգնում»,- նշում է Անուշիկը։
Կորոնավիրուսն ուղիղ հարվածի տակ առավ նաև վարսահարդարներին։ Մարդկանց՝ տնից աշխատելու, այսպես ասենք, բացասական հետևանքներն իր վրա արդեն մի քանի ամիս զգում է զրուցակիցս՝ Անին։ Նրա եկամուտները կրճատվել են մոտ 80 տոկոսով։
«Ոչ մի բանով այժմ չեմ զբաղվում։ Ես վարսավիր եմ, գնում էի մարդկանց տները, բայց այժմ գործ չունեմ, քանի որ մարդկանց մի մասը, որը տնից է աշխատում, սկսել է չօգտվել, մյուսներն էլ ընդհանրապես գումար չունեն։ Ինձ համար հիմա շատ դժվար է, վարձով եմ ապրում, չգիտեմ, վարձս այս ամիս ոնց եմ վճարելու»,- ասում է Անին։
Կորոնավիրուսը փոխել է աշխատաշուկայի պատկերն ամբողջ աշխարհում։ Գործազրկության ցուցանիշն աճում է, աշխարհը զուգահեռաբար պայքարում է վիրուսի դեմ և դրա հետևանքով աշխատանքը կորցրածների համար։
Հայաստանում ապրիլին համատարած սահմանափակումների շրջանում փակված շուրջ 70 հազար աշխատատեղից մայիսին վերականգնվել է 50 հազարը,- արձանագրում է վարչապետ Նիկոլ Փաշինյանը։
«Փաստորեն, արձանագրվեց, որ 20 հազար քաղաքացիներ կան, որոնք կորոնավիրուսի այս շրջանում աշխատանքը կորցրել են և նոր աշխատանք չեն գտել: Մենք որոշեցինք աջակցություն ցուցաբերել այդ մարդկանց: Ընդ որում՝ հույս ունենք, որ աշխատատեղերի վերականգնման այս պրոցեսը կշարունակվի»,- նշում է Փաշինյանը:
Կառավարությունն աշխատանքը կորցրածներին կաջակցի հակաճգնաժամային 22-րդ ծրագրով։ Աշխատանքի ու սոցիալական հարցերի նախարար Զարուհի Բաթոյանի խոսքով՝ նվազագույն աշխատավարձի չափով աջակցություն կստանան նախորդ ամիսներին աշխատանքը կորցրած քաղաքացիները։
«Շահառուները Հայաստանի այն քաղաքացիներն են, որոնք առնվազն 85 օր աշխատանքային պայմանագիր են ունեցել կամ աշխատանքային իրավական այլ ակտով աշխատանքային հարաբերությունների մեջ են եղել գործատուի հետ , 2020թ հունվարի 1 մարտի 31 ընկած ժամանակահատվածում, սակայն մարտի 31-ից մինչև հունիսի 1-ն ընկած հատվածում ազատվել են աշխատանքից ու այլ աշխատանքի չեն անցել»,-ասում է Բաթոյանը։
Բացառություն են բանկային, ֆինանսական ոլորտի ներկայացուցիչները։
Մասնագիտությունների վերապրոֆիլավորում․«Ռադիոլուրի» հետ զրույցում զարգացման ու կառավարման խորհրդատու Կարեն Սարգսյանն ն առաջարկում է մտածել ու շարժվել այս ուղղությամբ։ Ապագայի աշխարհն ավելի շատ որոշակի հատկանիշներ ունեցողների կարիք է ունենալու՝ ասում է փորձագետը։
«Օրինակ՝ խնդիր լուծողի։ Հենց այսօր այն կազմակերպությունը, որն ունի այդ կարողությունով աշխատակից, շահել է։ Աշխատակիցը նստում, մտածում է, թե ինչպես են իրավիճակից դուրս գալու։ Մինչդեռ «թույն» ինժեները տանը նստած է, աշխատանք չունի։ Նույնը նաև վերլուծական կարողություններ ունեցողների մասին է»,-աում է Կարեն Սարգսյանը։
Կորոնավիրուս կոչվող այս պատերազմում մարդկությունը, թերևս, կհաղթի։ Թե ինչ գնով ու երբ , կախված է այսօրվա գործողություններից։
