Մինեսոթայի նահանգապետը դիմել է Ազգային գվարդիայի օգնությանը՝ աֆրոամերիկացի Ջորջ Ֆլոյդի մահվան պատճառով սկսված ցույցերը կասեցնելու նպատակով: «Ամերիկայի Ձայնը» գրում է, որ խաղաղ բնույթ կրող ցույցերը հինգ գիշերների ընթացքում վերածվել են անկարգությունների ու բռնությունների:
«Մենք հարձակման տակ ենք»,- ասել է Մինեսոթայի նահանգապետ Թիմ Ուոլցը և խոստացել «ամբողջ ուժով» կարգուկանոն հաստատել նահանգում:
11 այլ նահանգապետեր, ներառյալ Ջորջիայի, Քենթաքիի, Օհայոյի, Վիսքոնսինի, Կոլորադոյի, Յութայի, Վաշինգտոնի, Կալիֆոռնիայի, Թեննեսիի, Միսսուրիի և Թեքսասի նույնպես դիմել են Ազգային գվարդիայի օգնությանը անկարգությունները կասեցնելու համար:
Կալիֆոռնիայի նահանգապետ Գավին Նյուսոմը Լոս Անջելեսում հայտարարել է արտակարգ դրություն:
Ինդիանապոլիսում շաբաթ օրը ցույցերի ժամանակ հրազենային կրակոցներ են հնչել: Արդյունքում մեկ մարդ է զոհվել, մի քանիսը՝ մարմնական վնասվածքներ ստացել: Ոստիկանապետ Ռենդալ Թեյլորը խորհուրդ է տվել այն մարդկանց, ովքեր այնտեղ չեն բնակվում լքել տարածքը՝ ասելով,-«քաղաքի կենտրոնն այս պահի դրությամբ անվտանգ չէ»:
Նյու Յորքի նահանգապետ Բիլ դե Բլասիոն ելույթ է ունեցել ցուցարարներից ոչ հեռու գտնվող տաղավարում և նրանց հորդորել տուն գնալ: Դե Բլասիոն ասել է, որ չի դիմի Ազգային գվարդիայի օգնությանը և որ քաղաքի ոստիկանական բաժանմունքը «ճիշտ կազմակերպությունն է» այս իրավիճակին արձագանքելու համար, քանի որ նրանք «հասկանում են» Նյու Յորքը:
Այն բանից հետո, երբ ոստիկաններն ավտոմեքենաներով մտել են ցուցարարների ամբոխի մեջ, Դե Բլասիան ասել է, որ կցանկանար, որ ոստիկաններն «այլ մոտեցում» ցուցաբերեին:
Շաբաթ օրը հազարավոր ցուցարարներ դուրս էին եկել նաև Չիկագոյի փողոցներ… Վերջիններիս գործողությունների մասին խոսելիս քաղաքապետ Լորի Լայթֆութն ասել է, որ դրոշն այրելն ու այլ անկարգությունները «վերածվել են հանցավոր վարքագծի»: Լայթֆութը պարետային ժամ է հայտարարել 21:00 մինչև առավոտյան 06:00-ը:
Վաշինգոտնում Սպիտակ տան հարևանությամբ ընթացող ցույցերը շաբաթ երեկոյան վերածվել են անկարգությունների: Ցուցարարների մի մասը հրավառություններ է սկսել, ապա պլատիկ շշեր նետել Գաղտնի ծառայության աշխատակիցների և ԱՄՆ-ի Ազգային պարկերի ոստիկանության ուղղությամբ: Ցուցարարները թալանել են նաև Սպիտակ տան մոտակա շրջակայքում գտնվող խանութները: Արդյունքում գործի են դրվել Վաշինգտոնի տարածքի ԱՄՆ-ի Ազգային գվարդիայի ուժերը՝ Սպիտակ տունը պաշտպանելու համար:
Քեննեդի տիեզերագնացության կենտրոնում SpaceX-ի տիեզերանավի արձակման շուրջ խոսելուց հետո ԱՄՆ-ի նախագահ Դոնալդ Թրամփն անդրադարձել է նաև Ջորջ Ֆլոյդի մահվանը:
«Ջորջ Ֆլոյդի մահը Միննեապոլիսի փողոցներում ծանր ողբերգություն էր: Դա երբեք չպետք է պատահեր: Երկրով մեկ ամերիկացիները համակված են սարսափով, զայրույթով և վշտով»,- ասել է նա:
Նա նաև հավելել է, որ արդարությունն է, այլ ոչ թե քաոսը հիմնական առաքելությունը և Մինեսոթայի իշխանություններին կոչ արել վերահսկել իրավիճակը:
Ըստ հրապարակված տեսանյութի, ձեռքերը շղթայված Ջորջ Ֆլոյդը մի քանի րոպե խնդրում էր ոստիկանին, ով ծնկով սեղմել էր նրա պարանոցը, հանել ծունկը՝ բացականչելով, «չեմ կարող շնչել»: Սակայն ոստիկանն իր ծունկը նրա պարանոցի վրա է պահել 8 րոպե 46 վայրկյան, որից մոտ երեք րոպե 46-ամյա Ֆլոյդն այլեւս չէր շարժվում: Ծունկը հանելուց երկու րոպե առաջ մյուս ոստիկանը ստուգել էր Ֆլոյդի աջ դաստակը ու չէր կարողացել զգալ զարկերակային անոթը: Ֆլոյդին հիվանդանոց տեղափոխելուց մեկ ժամ անց հայտարարվեց նրա մահվան մասին:
Դերեք Շովինը՝ այն ոստիկանը, որը ծնկով սեղմել էր Ֆլոյդի պարանոցը, ևգործողությանը մասնակից երեք այլ ոստիկաններ հեռացվել են աշխատանքից: Ուրբաթ օրը Շովինի դեմ մեղադրանք է ներկայացվել երրորդ աստիճանի սպանության մեջ: Նրան սպառնում է մինչև 25 տարվա ազատազրկում: Ֆլոյդի ընտանիքն ավելի կոշտ մոտեցում է պահանջում:
