«Նորք» ինֆեկցիոն կլինիկական հիվանդանոցի ինֆեկցիոնիստ, առաջին բաժանմունքի ղեկավար Օֆելյա Նալբանդյանը հաղթահարել է կորոնավիրուսը և այսօր մյուսների նման պատրաստ է գնալ համավարակի առաջնագիծ, սակայն հարկադիր պարապուրդի մեջ է։
Կորոնավիրուսով վարակակիրների հետ աշխատել է մարտի սկզբին։ Ասում է, որ հաճախ չեն հասցրել կանոններով հագնվել, արագ դրել են դիմակն ու շտապել հիվանդի մոտ:
«Մենք աշխատել ենք հայտնի դեպքերի հետ. Էջմիածնի դեպքերը, Մասիսի գործարանից խմբերով էին գալիս։ Դեռևս նոր հանված, հասցնում էինք դիմակն ու ձեռնոցները դնել, խալաթը գցել, այդպիսի դեպքեր եղել են, ինձ թվում է այդ ժամանակ եմ վարակվել»,- ասում է բժիշկը։
Վարակակիրների հետ աշխատել է մոտ 15 օր, մինչև կառավարության՝ մեծահասակ բուժաշխատողներին հարկադիր պարապուրդի ուղարկելը։ Տանը մեկ օր մնալուց հետո է զգացել է որոշ թույլ ախտանշաններ։
«Ես չեմ ջերմել, զգացել եմ մկանացավ, ունեցել եմ զգացողության խանգարումներ բերանի շուրջ։ Առաջին ախտանշանս դա է եղել։ Եվ ես անմիջապես հավաքվել եմ ու գնացել հիվանդանոց»,- պատմում է Օֆելյա Նալբանդյանը։
Բժշկուհու մոտ կլինիկական երևույթները՝ ջերմություն և թոքաբորբ, արդեն զարգացել են հիվանդանոցում։ Իր աշխատավայրում՝ «Նորք» ինֆեկցիոնում, կոլեգաների հոգատարության արդյունքում է հաղթահարել կորոնավիրուսը։
«Ընդհանրապես հիվանդանոցում ամեն ինչ կատարվում է լիարժեք։ Ես ստացել եմ սովորական ուղեցուցային բուժում։ Հավատը մեր բժիշկների, առողջապահության նախարարության նկատմամաբ օգնեցին ինձ հաղթահարել վիճակը։ Ես հավատում էի, որ բուժվելու եմ»,- ասում է բժշկուհին։
Բուժվելուց հետո ինֆեկցիոնիստ Օֆելյա Նալբանդյանը չի վերադարձել աշխատանքի՝ հարկադիր պարապուրդի մեջ գտնվելու պատճառով։ Սակայն հեռվից էլ անհանգստանում է յուրաքանչյուր պացիենտի առողջության համար։ Պատրաստ է նորից վերադառնալ համավարակի առաջնագիծ և մասնագիտական հմտությունները կիրառել հիվանդների շուտափույթ ապաքինման համար։
