Շուրջ մեկ տարի առաջ՝ 2019-ի օգոստոսին, վարչապետ Նիկոլ Փաշինյանը ձևակերպեց համազգային 6 կոնսենսուսները՝ դրանց մեջ առաջինը նշելով բռնության բացառումը։ «Բռնությունը պետք է բացառվի ներհայկական որեւէ հարցի լուծման գործիքակազմից», — հայտարարեց վարչապետը։
«Ցանկացած բռնությունթուլության դրսևորում է, պետական կառավարման համակարգում պետք է փորձենք թուլություններ չունենալ, — ասում է «Արժեքների հեղափոխություն» հաղորդաշարի հեղինակ Վահե Հովհաննիսյանը։
Նրա կարծիքով՝ բռնություն կիրառման որևէ դեպք փոխզիջում չի ենթադրում։
«Արդարացումը, թե սադրանքի հետևանք էր, հիմնավոր չէ․ցանկացած բռնություն ինչ-որ սադրանքի արդյունք է»,- ասում է Հովհաննիսյանը՝ անդրադառնալով խորհրդարանում տեղի ունեցած միջադեպին։ Նրա դիտարկմամբ՝ տեղի ունեցածը դատապարտվեց, բայց կար նաև «բայց», մինչդեռ որևէ կոմպրոմիս պետք է չլիներ։
«Եթե նախկինում կարողանում էինք խոսքով ամեն ինչ փոխել, ապա հիմա ինչու այդ խոսքի դեմ ոչինչ չունենք ասելու, որքան էլ այդ խոսքը շաղախված է թույնով , կեղծիքով, մարդկանց մանիպուլյացնելու ցանկությամբ», — ասում է Հովհաննիսյանը և առաջարկում լրջորեն մտածել այն հարցի շուրջ, թե ինչով պետք է հակադարձենք այդ խոսքին։
