Եթե աշխարհում գտնվի մի համաճարակաբան, որը կներկայացնի COVID-19 վարակի` անշունչ առարկաներից մարդուն փոխանցվելու մեկ փաստ, ապա գուցե արդարացված լինի փողոցները լվանալն ու ախտահանելը` ՙՌադիոլուրի հյուրասրահ՚-ում ասել է Ախտաբանների ասոցիացիայի նախագահ, Երևանի գլխավոր ախտաբան Արմեն Մխիթարյանը։
Կորոնավիրուսի վարակը կանխարգելելու հարցում բժիշկ ախտաբանը կարևորում է հիգիենայի անհատական կանոնների պահպանումը՝ առաջնային միջոց համարելով ձեռքերը հաճախ լվանալը։
ԱԻՆ Փրկարար ծառայության տնօրեն, փրկարար ծառայության գեներալ մայոր Վրեժ Գաբրիելյանը խոսել է վարակազերծման աշխատանքների մասին։ Նրա խոսքով՝ փրկարարների կողմից օրական 800-ից 1000 կառույց է ախտահանվում։ Մինչև հիմա փրկարար ծառայությունը վարակազերծել է հանրապետության ավելի քան 1700 տարածք։
Այս ընթացքում կորոնավիրուսի համավարակը չի շրջանցել նաև ԱԻՆ աշխատակիցներին․ նրանց շրջանում գրանցվել է հիվանդության վարակման 13 դեպք, 5-ը բուժվել է, 8-ի բուժումը շարունակվում է։ ՆախարարությաՆ 51 աշխատակից մեկուսացված է եղել, 110–ն էլ ինքնամեկուսացվել է։
