ԿարևորՀասարակություն

«Արաբկիր» բժշկական համալիրը վերադառնում է պլանային գործողությունների ռեժիմին

«Արաբկիր» բժշկական համալիրից հայտնում են, որ որպես COVID-սպասարկող բուժհաստատություն` չունի բուժաշխատողների վարակման դեպքեր, բոլորի թեստերը տվել են բացասական պատասխան եւ «Արաբկիրը» վերադառնում է պլանային գործողությունների ռեժիմին` խստորեն պահպանելով հակահամաճարակային կանոնները:  

Առողջապահության նախարարության ծրագրով՝ COVID-19-ով վարակված երեխաների բարդացած, ինչպես նաեւ տարբեր հիվանդություններով զուգակցված դեպքերի բժշկական օգնությունը ստանձնել է «Արաբկիր» բժշկական համալիրը:

Աշխատանքը կազմակերպելու համար համալիրը բաժանվել է երեք մասի.

Առաջինը COVID-վարակված պացիենտներին սպասարկող մասն է,  որտեղ 1 ամիս անընդմեջ աշխատել են բուժաշխատողները` երկու հերթափոխով, իզոլացված պայմաններում:

Երկրորդ մասը COVID-կասկածելի եւ կոնտակտավոր պացիենտների ժամանակավոր մեկուսացման բաժանմունքն է, որտեղ իրականացվում է COVID-թեստավորում: Այս բաժնում նույնպես բուժաշխատողների մի մասը գտնվում էր մեկուսացված պայմաններում։

Երրորդ մասում բժշկական օգնություն են ստանում այն պացիենտները, որոնց  COVID-թեստը տվել է բացասական պատասխան կամ նրանք ի սկզբանե չեն համարվել COVID-կասկածելի:

Մտավախությունը, թե COVID-կասկածելի, կոնտակտավոր եւ հաստատված պացիենտների հետ աշխատողները վաղ թե ուշ վարակվում են կորոնավիրուսով, փարատվել է: COVID-19-ը սպասարկող «Արաբկիր» բժշկական համալիրի բոլոր բուժաշխատողները ենթարկվել են թեստավորման եւ ստացել բացասական պատասխան: 

«Իզոլացված թոքաբանական /COVID/» եւ  «Ժամանակավոր մեկուսացման» բաժանմունքներում  աշխատանքը կազմակերպվել է հատուկ պաշտպանիչ համազգեստով եւ անհատական պաշտպանության մյուս միջոցներով: Նախքան այս բաժիններ աշխատանքի մտնելը բուժաշխատողները հատուկ դասընթաց են անցել. բժշկական համալիրի համաճարակաբանը նրանց սովորեցրել է աշխատանքի անվտանգության եւ կանխարգելիչ վարքագծի կանոնները:

COVID-19-ի նկատմամբ այս լոկալ հաղթանակը թույլ է տվել «Արաբկիր» ԲՀ-ին վերանայել աշխատանքի կազմակերպումը: Հատուկ բաժանմունքներում  հերթապահությամբ  աշխատող բուժքույրերն ու  սանիտարներն այսուհետ կկարողանան դուրս գալ բաժանմունքից եւ գիշերել տանը, իսկ բժիշկները COVID-պացիենտների առավոտյան համայցից հետո կշարունակեն իրենց աշխատանքը բժշկական համալիրում՝ սովորական ռեժիմով:

COVID-ը կարելի է հաղթել միայն պրոֆեսիոնալիզմով և կարգապահությամբ:

Back to top button