Հասարակություն

Թողարկուած է «Ընդարձակ Բառարան Գերմաներէնէ-Հայերէն»

nairi.com կը յայտնէ, որ ընդառաջելով Գերմանիոյ հայ համայնքի առաջարկին եւ հեղինակի ցանկութեան, այսօր թողարկուած է Լեւոն Թորոսեանի՝ «Ընդարձակ Բառարան Գերմաներէնէ-Հայերէն» ծաւալուն աշխատութիւնը առցանց տարբերակով, որ լոյս տեսաւ 2018 թուականին՝ Վիեննայի մէջ։

Բառարանի առցանց տարբերակը հասանելի դարձած է «Գալուստ Կիւլպէնկեան» հիմնարկութեան։

Բառայօդուածներուն բացատրութիւնները տրուած են թէ՛ արեւմտահայերէն եւ թէ՛ արեւելահայերէն՝ երկու ուղղագրութիւններով, այսպիսով մատչելի ըլլալով թէ՛ «հին» եւ թէ՛ ալ «նոր» սփիւռքին, ինչպէս նաեւ Հայաստանաբնակ հանրութեան համար։

Բառարանը ունի 85,000-է աւելի գլխաբառ, եւ ճոխ է նորաբանութիւններով. օրինակի համար՝ detox, Emoji, E-Reader, Flashmob, Hipster, Know-how, Selfie, Selfiestick, Windfarm, Workshop, Yoga. յապաւումներով՝ EU, NATO, WHO, WTO, եւ այլն. համակարգչային եզրերով՝ App, Byte, Debugging, Hyperlink, OCR, Open Source, URL, Wiki եւ այլն. ինչպէս նաեւ միջազգային եզրերով (անգլերէնէ, լատիներէնէ, ֆրանսերէնէ եւ իտալերէնէ)՝ en masse, Haute Couture, grosso modo, Deus ex Machina, eo ipso, ex ante, եւ այլն։ Աշխատութեան երկրորդ մասն ալ Աշխարհագրական Անուններու բառարան մը կը պարունակէ։

Բառարանին պատկերահանուած տարբերակը որոնելի է գլխաբառերով եւ հասանելի է հետեւեալ հասցէով՝ 

http://www.nayiri.com/imagedDictionaryBrowser.jsp?dictionaryId=132

Back to top button